近日有消息指大陸研發疫苗成功，更指香港市民最快4月有得打針，呢個消息對抗疫當然係喜訊，但同時亦有人擔心有副作用。
導演張堅庭日前就喺社交平台發帖，話不如叫班港官打針先，仲講笑話無論打完有事定冇事，都會令香港安全！原本呢啲網上開玩笑好平常，點知打碎晒一班五毛玻璃心，狙殺張堅庭，搞到佢要刪文自我犧牲，仲自嘲「喜劇導演唔講得笑話有啲慘」。
其實張堅庭嘅帖文，好多香港人成日都講，佢只係話「讓政府高官先行打疫苗，如果佢哋安全，即疫苗安全。如果佢哋死咗，咁香港就安全。」呢啲抽水式嘅幽默，係香港人都心領神會，但就狠狠打碎強國五毛嘅弱小心靈，好多五毛努力翻牆留言狠狠批評，仲有五毛喺微博轉載其帖文，而且不忘標籤佢係「港獨分子」。
張堅庭見到成地玻璃碎，最終刪除帖文，並發聲明強調「最近有人用我圖像，塞一些話進我口，其實只是一些西洋幽默風趣笑話，我繙譯成中文，不過有朋友以為是我所言，太太責備我亂咁share，為此我的分享如果引起一啲人情緒不安，我真係好唔好意思，在此致歉」。
不過張堅庭不忘自嘲一番，「喜劇導演唔講得笑話有啲慘，為了大局，只好犧牲自己，收返先。仲有呀，我是支持政府有效施政的。」佢亦貼出英文原圖，證明真係抄人嘅，不過仍有網民留言撐張堅庭，仲好抵死話希望中央接納張導建議。
李八方