早前鬧離隊嘅美斯最終決定留喺巴塞隆拿，周三巴塞友賽西乙基羅納，美斯就喺禁區外用左、右腳各入一球，加埋菲臘比古天奴都有波入，幫巴塞喺呢場友賽贏3:1，友賽連續兩場贏晒。今個周六，巴塞會踢多場對艾爾切嘅友賽，之後27號就會喺西甲新季第一場主場對維拉利爾，不過新上任嘅教練朗奴高文，呢場未必可以督師，西媒報道，雖然巴塞上個月歐聯出局後，球會已宣佈對拜仁係前教練施迪安嘅last game，但原來巴塞仲未通過正式渠道通知賽會炒施迪安，報道指巴塞同施迪安仲未就賠償達成協議，由於雙方未傾掂數，所以高文仲未註冊，搞到佢第一場未必可以帶隊，至於之前高文教嘅荷蘭，就有傳搵法蘭迪保亞接手。