由美國籍嘅劉亦菲主演、迪士尼耗資二億美金製作嘅電影《花木蘭》，上映前後均惹爭議，好多網民仲狂踩劉亦菲扮嘅花木蘭唔掂。港台記者兼節目主持利君雅喺前晚播出嘅港台節目《視點31》，以花木蘭上戰場盔甲裝扮出現，探討花木蘭身世，網民睇完大讚利君雅造型「好正」，仲話叫港台開套《花木蘭》搵利君雅做主角。
《視點31》以花木蘭身世做主題，着上盔甲出場嘅利君雅同彭德章，除咗提到電影版入面花木蘭民族及身處時空，打扮，統統不符歷史外，仲引述有學者分析《木蘭辭》，以「可汗」取代「皇帝」、「君主」等漢人稱呼，認為花木蘭應是北魏鮮卑人，借「明駝」而不是「駿馬」等均間接顯示木蘭並非「漢人」，加上電影轉移時空及改變主角的民族，惹來《花木蘭》是否被蓄意「漢化」的懷疑。
利君雅嘅花木蘭扮相好快畀網民廣傳，好多網民睇完大讚之餘，仲話利君雅造形好過劉亦菲，仲話花木蘭係胡人，港台開套《花木蘭》搵利君雅做主角更適合。
李八方