某位著名投資者四圍撲水，起初我是不相信的，因為他身家數以百億計，點唔掂都唔會衰到變平民。但最近讓我知道，原來他竟然向一家中小企老闆提出私人貸款請求，那刻我信了。為何相信了？因為他向這老闆只是借1億元，利息高達15厘，還款期約一年內，並願意以物業作為抵押。堂堂百億富豪，竟然衰到連1億元這麼少的數目都要借，原來銀行已借爆，借到來這個層次，所以這刻我敢斷言：「佢真係好唔掂！」
為何這家中小企與這位著名投資者搭上關係？事源1990年代該公司創業初期向這位投資者承租好多舖位，開頭是業主與租客的關係，後來幫襯開見面多就變了朋友。及後該公司借殼上市，獲大陸揼水，公司搞得不錯。中小企老闆賺了錢亦好簡單地購入不少資產作私人投資，以保守穩健作風生存至今，睇到他盤數，疫情下要取幾億元流動資金出來是完全沒有難度。相識多年的朋友有難，中小企公司老闆卻袖手旁觀，聽講這位老闆大致說：「有物業抵押又點呀！喂，現時咁嘅市，個個都揸現金㗎啦，啲貨之後會唔會跌呢？唔制啦。現時佢搞到一鑊泡，周身都唔掂。」
做人好來好去，這位老闆又點會把上述真心話講出來，而是以大路藉口推卻，就是「面對疫情，公司暫時面對經營困難，資金緊絀，未能提供援助，深感抱歉！」而我只看到「商業世界，你死你事」。
小師兄