自從領隊阿迪達同體育總監伊度上任後，阿仙奴拎咗兩個冠軍之餘仲搞作多多，繼今個夏天免費簽入韋利安之後，早前又叫埋佢同大衛雷斯一齊開直播，介紹巴西同鄉、地標戰有份入波嘅22歲中堅加比爾馬加希斯加盟。禮拜二仲帶畀球迷驚喜，喺社交網站一度暗示會有重大消息宣佈，原來係球隊隊長奧巴美揚落實續約，呢位31歲球隊首席射手仲喺ig開直播，枱面放咗個黑豹頭盔同隊長臂章，仲搵埋隊友拿卡錫迪同名宿伊恩胡禮一齊傾偈，同球迷即場分享續約喜悅呢！
原定下年夏天就會完約嘅奧巴美揚，一直都未肯同球會簽賣身契，直至禮拜二終於宣佈，同槍手續約到2023年夏天，意味阿仙奴短期內都唔使再賣隊長。英國天空體育就報道，31歲嘅奧巴美揚續約之後，周薪會由18萬鎊（大約180萬港元），加人工至25萬鎊嘅周薪，據報合約上仲有唔少獎金同忠誠條款，例如幫到球隊贏到歐聯資格，或自己再成為英超神射手嘅話，就會再有錢收，有機會令到呢位加蓬球星，收入直逼35萬鎊周薪、享受緊球會頂薪但唔使點落場踢波嘅德國中場奧斯爾。
奧巴美揚續約之後就話：「其實我用咗好多時間去考慮，一年前已經開始喺度諗。我同阿迪達傾過，佢畀咗好清晰嘅理念我，係有關球會同我嘅未來嘅，佢好直接咁話我可以離隊，加盟其他可以奪冠嘅球隊，或者留低成為球會傳奇，對於我嚟講呢個係一個關鍵。」阿迪達就話奧巴美揚留隊，對球隊嚟講係非常重要，因為佢係球隊嘅領袖、重建嘅重要拼圖。
不過阿仙奴另一名英足盃同社區盾雙冠王功臣，阿根廷籍門將達米安馬天尼斯同日就喺ig上傳短片，情深地宣佈自己會告別兵工廠，坦言球會上下都支持佢尋找正選機會嘅決定，仲話自己好高興可以成為阿仙奴一份子長達11年，最終佢就以2,000萬鎊轉投阿士東維拉，簽約四年。另外效力中超上海上港嘅巴西球星奧斯卡杜斯山度士，近日就爆料話兩名前車路士隊友大衛雷斯同韋利安，今個夏天都叫過佢轉投阿仙奴，不過佢就俾上海上港高薪合約縛住走唔到，不過29歲嘅奧斯卡坦言，自己希望重返歐洲首選始終係曾效力過嘅車路士，又話去意甲都唔錯喎！
