身兼行政會議成員嘅新民黨主席葉劉淑儀前日喺facebook發帖，話喺港島寶雲道行山時見到好多豪宅盤「割價」、「急售」廣告，即時專家上身話反映港人有信心危機，特區政府要諗方法並有實際行動，俾網民寸佢扮唔關自己事。
自由黨榮譽主席田北俊都睇唔過眼，即時分享葉劉帖文，仲暗寸乜佢都有責任：「（葉劉）仲問點解香港搞成咁嘅？啲行政會議議員講到好似同自己冇關係咁樣。」
田少咁嬲又唔奇，事關佢做過行會成員，梗知行會有集體負責制，正如有政圈好事之徒話，𠵱家行會好似無掩雞籠，一係好似葉劉咁，得閒插吓政府施政有問題，扮到政府衰咗唔關佢事；再唔係好似張宇人咁，政府防疫政策唔啱心水又鬧下官員，好似啲政策唔關行會事咁，個個行會成員鍾意噏乜就噏乜，完全冇紀律冇隊形，又難怪田少咁火。
李八方