【姐匙Talk】長貴扮大佬要全世界遷就

有啲朋友係要嚟保護、有啲朋友就要嚟出賣，講緊出賣朋友嘅人就係「長貴」。最近長貴幫「碎牛」加持、用人格保證話碎牛為人，點知越幫越忙，搞到一直冇出過聲嘅碎牛，無啦啦捲入是非之中，仲搞到其他人以為碎牛有問題，以為佢表面扮好人，背後為咗利益而下跪，睇怕出動拆彈專家都搞唔掂。

查實長貴已經唔係第一次做埋啲無謂嘢，好似喺社會運動初期，佢已經成日叫人杯葛呢個嗰個，嗰陣啲朋友仲可以包容吓佢，把口話佢麻鬼煩，但係隻手都會幫佢轉發，點知長貴以為自己真係大佬，人人都要聽佢話，只要有啲嘢唔符合佢嘅玻璃心，佢即刻會出聲。

要求改手勢被無視

好似最近佢主持音樂節目，咪以為係因為佢紅先搵佢幫手，查實係因為佢要還騷先畀佢做，鬼咩，次次出嚟都俾網民狙擊，又要成日做大佬，畀着合作嘅人都唔想搵佢啦！本來呢個節目有一個指定手勢，點知佢覺得個手勢有其他含意，要求大家唔好做，其他人聽完扮聽唔到，連一向順得人嘅元老都唔理佢，話晒呢啲係節目特色，點可以話改就改，最重要係全場得佢一個人咁講，長貴最後見大家冇反應，搞到面燶燶。

撰文：Jessie

本欄逢周三刊出

姐匙Talk

我姐匙縱橫歌影視幕後，多年冷眼旁觀，娛樂圈大小事都走唔過我雙眼，歡迎大家剝花生。