現年40歲的方力申自從與舊愛鄧麗欣分手後，變成城中筍盤，近日更有多位女神公開向他示愛。繼早前蘇皓兒接受《蘋果》訪問時指小方符合她的擇偶要求。日前陳瀅與小方接受網上節目訪問時，更直認他是理想對象。陳瀅除大爆小方約過她食飯，又將自己的戒指除下來遞給對方，似暗示可以向她求婚，令小方面紅失措。
伍詠薇和林盛斌主持的網上節目《Tiger’s Talk》，日前請來方力申、唐詩詠和陳瀅接受訪問，大談戀愛話題，並於前晚播出。今次在訪問中，小方和陳瀅言談間甚有火花，雖然陳瀅近日被傳已和賭王何鴻燊的公子猷亨復合，但在節目中卻冧爆小方，舉動近乎公開示愛。
陳瀅在節目中率先大爆小方約過她食飯：「佢突然有一日問我，可唔可以單獨同我食飯，但後來冇發生到。因為疫情我由溫哥華返嚟，佢知我悶就叫我打電話畀個星座專家，師傅就話我2023、2024年會同個點點點嘅男士結婚，事後我再打電話畀方力申，同佢講師傅講過啲乜，佢話：『我都係喎！』又話我會同個屬猴嘅一齊，原來佢就係屬猴。」陳瀅指曾跟朋友分享此事，都指小方買通師傅。小方聽罷立即解釋：「我人生同一個單身而又有機會發展嘅女仔去街，次數係一隻手都數得晒，所以我俾唐詩詠同班朋友鬧，我諗住改變，所以我咪約陳瀅囉！」被追問是否對女方有感覺，小方沒有正面回答：「所以咪約佢食飯囉，都冇食到。」默認有打算向陳瀅展開追求，只是未能成事。
而當陳瀅被問到理想對象時，她立即指向和她隔着唐詩詠而坐的小方，更大讚小方心地好、外形又好，伍姑娘趁機狂撥媒人扇，小方呆在當場之際，陳瀅主動除低手上戒指交給小方，要小方幫自己戴戒指。陳瀅情緒高漲對小方說：「畀埋你喇，唔使你買呀！」唐詩詠也出口勸小方：「你可唔可以大膽啲？」小方面紅稱不知陳瀅「邊句真邊句假」，伍姑娘再推他一把：「最緊要自己開心。」阿Bob忍不住說：「陳瀅咁好你都唔鍾意，正人渣！」滿面尷尬的小方接過戒指後戴上自己的尾指。
後來唐詩詠更調位坐，讓小方同陳瀅坐在一起。此時，陳瀅笑到停不了，又不停拍打小方手臂，伍姑娘直指陳瀅是真鍾意小方。陳瀅竟直認不諱：「我都話係咯，我都唔知點解你質疑我……」然後伍姑娘等扮離場，更稱呼二人為方生、方太。不停儍笑的陳瀅步步進逼，主動跟小方合巹交杯，小方雖然尷尬到做出天然呆表情，但仍配合陳瀅，二人亦表現得十分陶醉，看來郎有情妾有意，很快湊成一對。翻查資料，陳瀅和方力申在2017年已經傳過緋聞，當時有報道指糖妹黃山怡為陳瀅穿針引線約小方食飯，同場雖然有其他朋友，但大家都沒有打擾陳瀅同小方，惟二人最後沒有下文。
另外，除陳瀅擺明車馬冧小方外，「氣質女神」蘇皓兒（Chloe）上月接受《蘋果》訪問，透露圈中有一位男藝人，外形、性格及嗜好，皆符合她的擇偶要求，她坦白說：「小方，因為佢屬運動型，夠健康陽光，以前鍾意呢個type。」