12個香港人成為中共「人質」，抗爭派朱凱廸同民主派涂謹申早前就同家屬開記招，點知呢場記招因為涂謹申一開場用英文簡單交代，竟然成為「罪證」，俾中通社引述建制派法律界人士「陳曉峰」直指佢係向美國交功課。「鋒」迴路轉嘅係，陳曉峰話佢冇講過，質疑係另有其「鋒」，於是有人估係咪有梁美芬徒弟外號嘅陳曉鋒，但最神奇係陳曉鋒又唔認係佢，咁究竟中通社訪問咗邊個？
件事原本好簡單，香港中通社日前刊出報道，引述「港區全國人大代表、香港與內地法律專業聯合會會長陳曉峰」質疑涂謹申講英文背後有目的，點知陳曉峰向傳媒嚴正聲明否認受訪同作出有關評論，質疑係另有其人。建制陣營確有另一個法律界人士個名同佢好類近，就係法學博士、香港法學交流基金會秘書長陳曉鋒，中通社噚日亦一度更新報道，將受訪者由「峰」變「鋒」，即係受訪嘅係「法學交流基金會秘書長陳曉鋒」。
本來件事應該完，點知好戲在後頭，唔知係咪隻「死貓」有啲難啃，於是輪到陳曉鋒向傳媒否認接受中通社訪問，但就認同個「來歷不明」嘅「陳曉鋒」講得啱聽，即係兩人都唔認俾官媒訪問！中通社全名香港中國通訊社，其實係大陸官媒，同中新社同屬國務院僑務辦公室系統，好難想像官媒會錯成咁囉！咁中通社點收科？八方噚晚想再搵出嚟研究時，發現已下架，呢個典型大陸手法──問題出喺個報道，消滅咗咪冇問題！
李八方