體育界是疫情下的重災區，正職為跳繩教練的Timothy當然大受影響，最近要間中兼任外賣員。不過作為運動員，疫情令賽事延期，卻正好為他換來時間，好好養傷。
Timothy以教跳繩維生，疫情下收入減半，「好多班都取消晒，以前1班8個、10個學生，限聚令下每班一人，收入自然大減，加埋有啲家長比較擔心，出街會較易染病。」
疫情下，盡量留在家中，不作無謂聚會，減少社交接觸是常識，但好動的Timothy長時間留在家中，寂寞難耐：「有段時間喺屋企，只係食同瞓，間中帶繩出去跳吓，感覺生活好冇意義。」因此，他加入外賣員行列，「順便踩踩單車，聽吓歌。有時做嘢會遇到同行，吹吓水，都可以識吓朋友，長長知識。」送外賣也有學問，有時要衝、有時要留，「去餐廳唔使太急，因為一定要等，但拎到嘢食後就要衝，要盡快搞掂，再接下一張單。」Timothy亦正考保險牌，不排除向這方面發展。
疫情令全球體壇停頓下來，對Timothy來說，反而也有正面影響，皆因他在5月時阿基里斯腱受傷，而跳繩世錦賽則本於7月尾舉行，「傷得都算嚴重，行路都痛，根本就冇辦法比賽。比賽停晒，對其他人嚟講係冇咗比賽機會，不過對我嚟講就贏咗休息時間。」世錦賽將延至明年7月，Timothy足足多了一年時間養傷，準備賽事。