上星期初同朋友在上海總會吃午飯，以前人氣爆燈嘅狀況已不復見，十分清靜。一份糖醋排骨非常好味，於是打包兩份回家，夥計話外賣有八五折，更加抵。事實上，不少會所在限聚令，堂食禁令期間，為求生存，紛紛推出外賣八五折，多賺一蚊得一蚊。朋友就話佢嘅多年相識開酒樓，日日嘆息外賣冇用，晚上冇客人到臨食貴價菜與飲酒，邊可能賺到錢吖，餐飲業正面臨危急存亡之秋，有一個大隱憂即將變成灰犀牛，就是第二期保就業計劃涉及9至11月工資津貼，有不少中小微企（當然包含餐飲）在12月就會關門大吉，關人個關，收咗政府嘅津貼，當作結業基金，到時本港失業率可能急升。
兩星期前，左丁山飯後行街，在地鐵站附近被人叫住，大家都戴口罩，定一定神先認得出對方係上海總會會長李德麟，李會長好客氣，叫左丁山多啲去上海總會吃飯，左丁山問佢：「依家餐廳蝕本，李會長有冇計劃裁員減薪，放無薪假？」李會長連忙澄清：「上海總會堅持與員工共度時艱，到現在為止，從未減薪，也不放無薪假期，總之要頂落去，請你多多光顧。」此乃良心僱主也。
另一良心僱主乃馬會，到沙田會所凱旋廳飲茶，兩人一枱靜嚶嚶，平時坐12人嘅大枱，亦係坐兩個人（上星期五開始可以坐四人），感覺十分滑稽，但侍應仍然有好多個，只係唔見咗一兩個人，問Captain：「阿Ａ、阿B去咗邊？」答案係阿Ａ、阿B所住屋邨出現確診，馬會要佢哋在家隔離近50日先至准再返工，薪水照支。隔幾日，見到阿B返工，問佢如何，佢答：「只有馬會先至會咁好，既堅持保障會員不受感染又准我放有薪假。」好人會有好報嘅，以往不少食肆到上海總會、馬會挖角，但經過今次疫情之後，恐怕外間出高薪都難到上總、馬會搶人咯，正是打生不如打熟，留在良心僱主地方工作，安全感一定大好多。好似一間飲食集團咁，根據蘋果日報報導，一方面叫資深僱員放無薪假，慳人工，另方面就聘請資歷淺，薪金低啲嘅人替代舊人做嘢，自以為聰明，殊不知，到好景恢復之時，好夥計一定搵工跳槽。