歌手陳柏宇和太太符曉薇（Leanne）結婚三年，育有快滿兩歲的女兒陳羿辰（Abigail），陳柏宇錫女錫到燶，不時把湊女點滴放上網，也不時遭指摘公開的相片不恰當，但陳氏夫婦都罕有回應。近日竟有網民惡意辱罵Abigail是「垃圾」，令Leanne忍不住立即扯火還擊︰「相信有報應！」而身為父親的陳柏宇更轟該網民︰「居然話BB垃圾，真係黐線㗎！」
現年37歲的陳柏宇和太太符曉薇近來頭頭碰着黑，早前Leanne自爆在6月懷孕一個多月時發現宮外孕，導致輸卵管爆裂，要切除左邊輸卵管兼終止懷孕，痛失第二胎，同月9歲大的鬆獅犬Victoria離世。Leanne日前就在Ig story上載一張私訊截圖，當中有人留言：「你個女正垃圾」、「廢物」，而此人設定為私人賬戶，沒有公開。
該網民的私訊令Leanne相當扯火，她留言：「作為一個公眾人物，周時都會遇到呢啲咁嘅人，通常都係會惡言我本人，極少會對小朋友惡言。我唔會回覆呢啲人，大家都無乜必要同呢啲人理論，因為我相信有報應，你估喺網絡上惡言就唔係做緊壞事？其實當你有壞嘅心態，無論一個動作，就算一句說話，你都種下咗一個因，所以你繼續種吧，承受嘅唔係我，只會係你自己，因為我心態比你強大。」
Leanne更表示平常會選擇隻眼開隻眼閉：「想同大家分享平時我哋面對緊嘅事，有啲嘢你哋肉眼睇唔到，係因為我哋都當睇唔到，所以請你哋做一個有同理心嘅人。」雖然遭惡意中傷，但無礙Leanne「晒B」心情，前日她就上載女兒熟睡被炸薯片利誘弄醒的短片，片中她笑說︰「有薯片，你就醒嘞，你睇你個樣幾樣衰，哈哈。」
《蘋果》昨日聯絡陳柏宇，他笑着回應：「好笑，居然話個BB垃圾，真係黐線㗎！我對上一次睇到人話一個BB係垃圾，應該會係卡通片或笑片。」陳柏宇表示不知道對方動機：「佢黐線冇理由同佢理論，如果佢話『我認為你個女係垃圾，因為咁咁咁……十幾歲做啲好愚蠢或唔負責任嘅事』咁都OK，但BB點會係垃圾？唔明佢出發點，純粹中傷，一定唔會理。」
其實，有「晒B狂魔」之稱的陳柏宇非常愛錫女兒，有指為讓囡囡有更多活動空間，今年3月一家人搬到何文田山畔的過千呎豪宅。不過，他過往分享與女兒的點滴卻屢遭洗版式狂鬧。前年10月，陳柏宇赤裸上身、用自己乳頭餵女兒，就被網民鬧變態。去年底陳柏宇上載一條幫囡囡沖涼片段，其間囡囡一度站起身，他雖然快手從後遮住囡囡重要部位，但就被指摘居然讓囡囡全裸出鏡。今年5月又試過上載女兒上身赤裸、用生果圖案遮蓋重要部位的相片，又立即遭瘋狂指罵。而陳柏宇向來都均鮮有回應，不過上月底就突然清空社交網所有內容，及後解釋是配合工作新安排。