有機會看唐人版迪士尼公主系列：Mulan。
不看猶自可，一路睇落嚟，每睇一分鐘增加幾把火！
遠在澳洲的朋友睇/捱到二十五分鐘，終於離場，費事眼冤。侄兒寄語自多倫多：Don’t Waste Your Time LOL！唔單止，更話：作為唐人，一面睇塊面㷫過辣雞，感覺羞恥；根本套戲拍嚟俾西方人恥笑華人……
即係傳統「辱華」！
睇戲絕少唔睇到尾，猶如食飯絕少冇衣食、食一半留一半，信念浪費可恥；自小作為迪士尼骨灰粉絲，點都要撐，努力堅持睇多一分鐘得一分鐘，超過二億美元的製作費用，Disney算盤從來打得誇啦啦，多年計算得宜有幾何輸？光睇千軍萬馬襯托蒼茫大地，鳥瞰望不盡山巒起伏雪落塞外風光，當睇National Geographic又好，當睇卡通公仔片都好，盡量睇到尾啦……
聽講台灣上映，木蘭當關贏盡票房；口碑？誰理！連內地影評成績都肥佬，縱使中華元素都冇面畀，相信全球最終埋單就算非過去迪士尼式獨佔鰲頭，點都有進帳。
人聲鼎沸話要抵制劉亦菲，走上國際舞台演木蘭之前；始終不同代，對後生仔嘅女神單單個名都模糊講來講去都搞錯，好彩冇聽啲人生冇乜成就、卻偏偏成日要做Opinion Leader嘅非專業KOL（即係冇錢收）點紅點綠啫；拒絕劉亦菲、唔係嘛？
成套「人版」木蘭，就劉一人氣蓋山河，電影製作放她生路，整套電影演員無數，就她與極少數例外，予以化靚妝：反串英俊瀟灑、女兒身亦英氣鋒芒；突然成為自己新關注的面孔與名字，對武漢出身的美籍華女產生極大興趣。
係，就係套戲裏面幾乎所有大角配角茄喱啡嘅「化妝」出錯！
十多年前英氣勃勃好樣得緊嘅Jason Scott Lee這次雖然演大奸角啫（對Disney從來不離不棄元素之美國value ，猶似粵語舊片：忠奸分明，善惡到頭終有報，若然不報時辰未到），使唔使咁醜樣呀？
作為白雪公主嘅死對頭，永遠打不死，每個故事必然以不同身份面貌出現嘅皇后、送毒蘋果嘅耄耋婆婆……鞏俐這次演繹人鳥共存於一身嘅女巫，面容險惡不在話下避過其他演員如鄭佩佩、天下至打得甄子丹塊面被化妝化到黃蠟一樣的「劇情需要」。（明續）