捷克作家米蘭昆德拉喺《笑忘書》入面話過，「人與極權的抗爭，就是記憶與遺忘的抗爭」，所以保存記憶以至守護歷史真相真係好重要呀！支聯會嘅「六四紀念館」之前因為武漢肺炎疫情需要休館，今日重開，同時延續之前做緊嘅展覽：走在抗極權最前線——從「八九六四」到「反送中」。為咗防疫，大會溫馨提示大家入場時必須戴口罩同量度體溫，如果發燒就唔好意思，歡迎擇日再來。
雖然實體館重開，但喺新形勢下支聯會亦不敢怠慢，早前完成咗網絡六四博物館眾籌，現時已經開緊工，包括將啲歷史資料文件掃描存檔，支聯會主席李卓人前日搵到寶，發現咗份當年嘅「愛國同胞萬人宴」菜單，仲形容「絕對係反屠城嘅最勁宣傳」。
呢餐喺「天安門大酒樓」盛宴有乜好「食」？15道菜由「武警、解放軍雙拚頭盤」打頭陣，仲包括羌葱煀耀邦、紫陽燉冬菰、清蒸小李鵬、陳皮燉小平、袁木炒魚球、紅燒大群眾、江澤炆蘿蔔等，甜品仲有唔易開稀芝麻糊、蓮子王丹茶、新鮮方荔枝，八方相信經歷過當年六四嘅人都一定睇得明。呢份文宣菜單，香港網民多年嚟間中都有舊事重提，希望呢份文宣唔會好快喺香港都變違禁品就好。
李八方