風水佬呃人十年八年，但政府嘅大話半年未夠已爆煲，仲要篤爆個大話嘅係自己人！呢排特首林鄭月娥話靠祖國已接近抗疫成功，又吹噓平息埋「黑暴」，早排接受官媒訪問仲話信心返晒嚟，但作為「姐姐」嘅新民黨主席葉劉淑儀就篤爆「妹妹」，話香港根本唔掂，仲有信心危機，仲話即使新一份施政報告派錢都冇用！有網民就寸身為行會成員嘅姐姐，搞成咁你都有份㗎！
葉劉噚日喺fb出帖，分享喺寶雲道行山時見到嘅「奇景」，話沿途幾乎所有燈柱、欄杆都貼滿豪宅盤廣告，表明割價、急售單位。姐姐如夢初醒，話反映香港出現令人憂心嘅現象，明顯響起信心危機警號！葉劉仲話以前建議過嘅派錢已經冇用，最重要係港府有實際行動令大家重拾信心同希望。
網民心水清，有人寸爆葉劉，指佢作為行會成員，香港搞到今日咁唔通冇責任？八方要幫佢回一回帶，想當日佢有份幫政府護航大力支持送中同國安法，仲話會令香港繁榮安定，家陣竟然話香港有信心危機，咁又算唔算將個鑊卸返畀北京？
李八方