禮拜日法甲，巴黎聖日耳門（PSG）爆冷又輸，主場0:1輸畀馬賽。呢場國家打吡火藥味勁濃， 補時仲爆發大衝突，球證全場總共出示咗破紀錄嘅14黃5紅，兩隊包括尼馬在內有五名球員喺補時被逐。當時勸交但手多多嘅尼馬，賽後喺twitter話俾艾華路蘇比朗種族歧視，仲話最後悔係冇一拳轟落佢塊面度。
上禮拜四PSG踢今季第一場聯賽，喺多名主力確診武肺缺陣下，以0:1不敵朗斯。今場PSG就有尼馬同迪馬利亞回歸，不過馬賽31分鐘憑皮耶開罰球，泰奧雲近門射入領先1:0，換邊後PSG先有迪馬利亞嘅入球被判無效，再有尼馬門前失機，令球隊唔能夠挽回敗局，PSG近年罕有咁開季聯賽兩連敗。
今場兩隊好火爆，尼馬多次被對方侵犯踢倒，上半場已經爆發咗次小衝突。最終完場前沉唔住氣，馬賽嘅賓尼迪圖爭頂時推咗里安度柏利迪斯落地，雙方即爆衝突，兩班球員湧上前，有啲勸交，有啲繼續口角，最激嘅係古沙華同馬賽嘅佐敦艾馬維，兩人先講手再互踢，最終雙雙領紅，而賓尼迪圖同柏利迪斯就被罰黃牌，一齊兩黃一紅出場。
本身勸交嘅尼馬，就俾球證翻睇VAR認為佢惡意打咗艾華路後腦一下，直接領紅出場。呢位巴西球星當時反應既無奈又激動，離場時仲同第四球證投訴自己遭種族歧視。賽後尼馬喺twitter嬲爆話：「最後悔就係冇打爆條友塊面！」之後再話：「要捉我打人好易，反而想知有冇人影到我畀人叫混賬馬騮?」其後，有鏡頭捕捉到艾華路當時口形疑似係講「混賬馬騮」侮辱尼馬，未知賽會會唔會秋後算賬。
另外，有指今場因中武肺隔離緊繼續冇份既基利安麥巴比，喺賽前已同PSG講咗今季後就會離隊，到下年夏天，麥巴比同球隊只係淨一年約，有傳利物浦、皇家馬德里同曼聯等大會都對呢位21歲前鋒相當有興趣。