限聚令放寬，四人可在食肆共吃晚飯，於是有老友約晚上飯局，點知其他人反應麻麻，原來好多人在家工作，大公司分晒AB team，輪流返中環，幾個月來已習慣咗。晚上由住所返回鬧區吃晚飯，都幾花時間，不如留在家中好過。咁又係嘅，以前人在中環返工，叫齊人去灣仔吃晚飯，坐地鐵話咁易，六時放工，七時開飯，返到屋企九點幾，可以接受。現在call人，一個在將軍澳、一個在九龍塘、一個在沙田，特登出番嚟灣仔吃晚飯，煩啲喎。
左丁山這幾個月因無晚上飯局，習慣咗早返屋企hea，如黃昏時再出中環灣仔吃晚飯，亦覺舟車勞頓，於是推得就推。呢日早上已回家，諗住開電視啱啱好，11點now新聞報告後，每日有主持人彭晴訪問中國日本專家馬鐵穎，如配合到時間，左丁山必看，因為馬鐵穎係日本通、中國通，每日講中國（間中講日本），有精闢見解，往往從微細事物中看到大事始末因由，真高手也。點知呢日彭晴訪問嘅係左派深藍大將阮紀宏，阮紀宏嘅立場同大公文匯差不多，係標準路綫派，左丁山未聽完，就熄電視機，以後唔使聽十一時新聞報告後嘅中國評論咯。後來打電話打聽吓，now TV新聞部已經同馬鐵穎拜拜，乃新人上台之決定，新人其實係老人，本已退休，突被睇起嘅陳鐵彪，原新聞總監張志剛退休，不由新聞部老臣子替上，而由外間聘用已退休人士替補，都幾揀擇。
不過消息人士話：「唔使覺得奇怪吖，你識寫港澳辦中聯辦要整頓香港教育及傳媒，應該明白多啲啩。以後呢類事情陸續有來，不是同聲同氣嘅唔啱聽，唔啱聽嘅，好難坐在高位。」
其實馬鐵穎講評論十分小心，引用好多內地媒體資訊，屬溫和務實派，語多中肯，好受觀眾歡迎，咁嘅評論員都無法立足於電視台，夫復何言！港大法律學院講師張達明研究香港法律數十年，佢都感慨言之，話對特區政府所講之法治問題感到陌生，似非相識。褚簡寧在專欄話香港有了一個supreme leader（最高領袖），其他人唔好講咁多嘢咯，否則又會被指別有用心，說三道四，黑白不分，心懷敵意，故意抹黑，為反對而反對……等等等！氣悶之餘，突然醒起，阮紀宏代替馬鐵穎有指標性作用，阮紀宏同路人代替梁家榮管理香港電台，已屬必然。