【本報訊】壹傳媒（282）早前股價急升，先有建制派要求股份停牌，後有警方迅速拘捕15人。安里控股主席兼行政總裁黃偉康向本報證實，證監會曾兩次向他查詢客戶戶口交易狀況，惟警方未有找他；最終壹傳媒事件的調查及拘捕行動，竟由警方捷足先登。
早前壹傳媒創辦人黎智英被捕，香港人為表態支持壹傳媒，有人不問價大掃壹傳媒股票。黃偉康憶起證監會曾至少兩次找他查問，包括客戶資料、是否公司董事及戶口開設時間等；警方卻無找他，惟結果卻由毒品調查科搶先行動，難免令人質疑警方專業性。
黃偉康憶述：「黎智英被拘捕後，282（壹傳媒）股價曾爆升超過10倍，證監同港交所即日搵我。到特朗普讚黎智英係勇敢嘅人嗰朝，壹傳媒升咗三成，lunch時證監已打嚟問，行動比我認知快好多；以往有啲公司股價大波動，可能係一兩星期後、甚至一個月後，證監先有email傳嚟（查問）。」
建制派如立法會議員張華峰，曾要求將壹傳媒停牌，黃偉康笑說他是前輩，不能說他不懂規例，「我相信佢係一種表態，有政治考慮。每日都有股票升3、4倍，跌6、7成又有，我唔希望代表我嘅議員，純粹做政治表態，多於實際考慮。業界今日嘅經營環境艱難，佢自己都做過中小型行，我當然希望佢多喺呢方面工作」。
黃偉康稱每一件事背後，金融界都會作出風險評估，「好似泰國出現黃衫軍、紅衫軍時，政治事件不斷發酵，political risk（政治風險）不斷提高，會影響企業盈利狀況。基金經理計完呢個市場嘅合理價值後，會畀個discount rate（折讓）佢」。
香港這一年出現《逃犯條例》修訂、港版國安法及三權分立問題，一連串事件令金融圈認為港股有大「政治折讓」，難以隨外圍股市同步上升，這絕非可以一笑置之的問題，「國安法後恒指好快落到二萬一，之後又上返二萬五，但唔一定係市場消化，只係外圍股市不斷創新高；大家都意識到，恒指到二萬六就完，係咁多，比高位有兩、三成差距」。
黃偉康指，「近排道指、標指唔跌得多，但港股就跟足跌得最多嘅納指，好明顯外國投資者對你有戒心；有人話大陸大把錢，但啲錢又撐唔起個市，港股未死，但唔會有好表現囉」。主流意見認為，11月美國大選前，美國對港政策會偏向強硬，黃偉康指，「好多分析都話香港、中國官員係等緊特朗普選唔到，反正都係等，可唔可以作風柔番少少？舒緩吓香港嘅政治風險折讓」。
從金融人眼中，香港有否變好的可能性？他頓了一下反問：「我調返轉問，你老細（肥佬黎）點解唔走？可能係我對香港仲存在一種愛，等於你問我，個女仔咁難頂都要頂，咪係愛囉。」