人民力量副主席「快必」譚得志畀國安處人員以發表煽動文字罪拘捕，仲要唔畀保釋，扣押係荔枝角收押所已經五日。之前不時參加抗爭活動、曾經同快必一齊被拉嘅深黃同志富商「劉公子」劉定成，最近探過快必，劉公子話快必雖然仲堅強同情緒ok，但收押所食物好差，快必冇乜點食嘢，搞到成個人瘦晒。
劉公子喺7.1時同擺街站嘅快必及慢必一齊被警方拘捕，事後仲係快必陪佢去「踢保」，兩個算係一齊抗爭過，所以今年70歲嘅劉公子知道快必被拉同扣押之後，非常擔心戰友情況，前日同張大衛牧師前往探快必。
快必目前被單獨囚禁喺荔枝角收押所幾十呎嘅房間內，劉公子同八方講，因為每日得兩個名額可以探佢15分鐘，所以佢同牧師都等咗個半鐘見到快必。
劉公子話快必情緒穩定，但快必外在堅強，內在真係冇人知，而且收押所食物比較差，快必每餐只係扒幾粒飯，所以佢個人都瘦咗，只係快必話唔介意。
劉公子又引述快必呼籲市民唔可以唔出聲，仲要加油，劉公子亦答應快必，噚日去慢必陳志全代佢係觀塘及藍田開嘅「抗疫」街站撐場，但因為唔想俾差人用限聚令告，所以劉公子好醒目咁遠離人群撐慢必。
李八方