香港足球代表隊中堅梁諾恆效力嘅中甲球會梅州客家，周日喺梅州賽區賽分組賽對「升班馬」遼寧瀋陽。今季中甲因武漢肺炎疫情延至上周六開鑼，18隊分到3個賽區作賽；梅州客家同貴州、陝西、江西、浙江及瀋陽同組，上季排第10嘅梅州喺呢組首輪迎戰上季中乙冠軍瀋陽，本地球迷焦點係今季由港超聯富力轉會到梅州嘅港腳中堅梁諾恆，25歲嘅佢獲巴西籍教練馬賽洛委以重任，同老將蕭震合組中路防線，面對中甲初哥瀋陽，上半場未受太大考驗，「細佬」防守表現唔錯，間中仲會喺後場以其擅長嘅長傳策動攻勢。梅州三分鐘就由梁學銘接應長傳突入禁區射入，半場領先1:0。易邊後，中鋒敦比亞再喺64分鐘接應角球禁區內撞射入網，細佬中甲首戰最終全取三分。