65歲資深DJ梁繼璋現為D100網台擔任主持，其長兄梁達璋昨日不幸在街上猝死，終年68歲。梁繼璋昨在電話中幾度泣不成聲：「哥哥今朝約咗朋友打網球，點知朋友唔知醒甩底，佢自己一個人去，佢打完波之後去停車場攞車時暈低咗，如果佢同朋友去打波嘅話，起碼有個人喺身邊照應。雖然有途人發現後即刻報警，但已經錯過咗搶救嘅黃金時間。哥哥心臟有事，送咗去將軍澳醫院之後，醫院即刻幫佢做通波仔手術，但已經救唔返，我同屋企人趕到去醫院時，佢已經走咗，因為疫情，我哋只能隔住玻璃同佢道別！」說話至此梁繼璋再次泣不成聲。
梁繼璋續說：「我哥哥有條血管塞咗，個心有時唔舒服，但佢自己冇諗到咁嚴重，諗住行得走得，所以冇好好處理。我覺得最遺憾係以為可以睇返WhatsApp聽返哥哥把聲，但原來我哥哥從來冇留低半句說話，只有文字，好可惜、好遺憾。」