早前同曼城中場菲爾科頓齊齊喺冰島攬女返酒店，而被逐出英格蘭國家隊大軍嘅曼聯新星格連活特又再出事！英國《太陽報》公開咗一段片，影住「綠木」幾個禮拜前開派對時，曾經吸服俗稱「笑氣」嘅一氧化二氮，呢段片仲俾佢朋友放咗上Snapchat，令到綠木再次成為輿論焦點。吸入笑氣可以引致心臟病同腦部受損，危害人體健康，綠木已經就事件發聲明認錯兼道歉，仲提醒公眾唔好學佢咁玩。報道引述消息人士話，格連活特周不時夜蒲完就會轉場吸笑氣，但係作為一位頂級運動員就應該更加了解笑氣嘅害處，仲話曼徹斯特好多年輕人都有吸笑氣，一罐可以吸20次咁多，認為綠木作為公眾人物，做出呢件事仲要俾人拍低咗，真係有啲蠢。綠木事後發聲明話：「我強烈呼籲大家唔好學我嘅行為，作為一個18歲嘅人，我時刻都仲係學習緊，但呢個禮拜我亦意識到，基於我嘅職業，外界會對我有更高嘅要求，我喺將來必須注意呢一點，我會盡力報答仍然信任我嘅領隊同教練。」