上個月藍絲群組有條「王亭之公開當年肥佬黎搵佢辦毒果的背景」嘅影片瘋傳，由所謂嘅中州派嘅所謂紫微斗數大師王亭之，言之鑿鑿話黎智英當年叫咗個「帶頭大哥」搵佢做《蘋果》老總，仲話畀1,000萬佢，點知轉頭就畀敝報專欄作家馮睎乾踢爆。馮翁噚日破天荒現真身（不過都戴口罩）同肥佬黎網上FAN享會中對談，兩個人當然傾到呢單《蘋果》創報「黑幕」，肥佬黎除咗踢爆王亭之大話，仲爆「帶頭大哥」係邊個。
肥佬黎話王亭之呢個吹水吹得好離奇，因為王聲稱1993年有「帶頭大哥」搵佢，但肥佬黎自爆話1994年唔知4月定8月先開始諗辦報，李柱銘仲係第一個知佢諗法嘅人，「（當時）喺日本，蔡瀾都喺度，我就講點解要做《蘋果日報》，嗰時連個名都未有。」
王亭之聲稱肥佬黎預咗用4,000萬，仲話會分1,000萬畀佢，更加係得啖笑，肥佬黎話證明佢對商業唔了解，「4,000萬用嚟setup都冇咗大半」，仲話當年一個月已經蝕8至9,000萬，「佢術數風水吹慣牛，吹牛吹到隨心所欲，稍為有啲知識都唔會信佢。」馮翁拆解埋王亭之吹水背後目的，「佢係講畀聽眾聽，好多徒弟喺大陸人跟佢學密宗，喺無知大陸人面前抬高自己，要表現自己愛國愛黨。」
肥佬黎又話王亭之喺其他報紙專欄寫開術數飲食，冇可能搵佢做總編，「你當我哋地盤工人？」最初佢想搵時任《南早》總編馮強，但馮強去咗《讀者文摘》做亞洲總編，可見肥佬黎當年有眼光。至於「帶頭大哥」身份，黎智英推斷呢個人係陶傑，「佢93年仲喺度乩童，我話佢，你咁都寫得出，佢話『係鬼上身寫』。」一個乩童加另一個大師，馮翁即時話咁嘅組合可以整份《冥通日報》，唔知肥佬黎會唔會真係打本畀番1,000萬冥幣畀大師呢？
李八方