年底之前嘅疫苗跑馬仔，進度最快嘅輝瑞疫苗有可能10月中面世。目前更大嘅挑戰，係疫苗點樣盡快運送到各間醫院、診所手上，仲要為人民接種時保持品質，空運界形容係現代史上物流界嘅最大挑戰。
點解？首先未知邊隻疫苗率先跑出，進度最好嘅3隻疫苗各有特性，例如阿斯利康疫苗可以喺攝氏2至8度之間儲存，至於輝瑞同Moderna嘅疫苗就要喺攝氏-70至-80度之下儲存，後兩者疫苗解凍然後放入雪櫃，分別只能儲存兩日同一星期，至於大部份醫院診所都冇超低溫儲存疫苗嘅器材，器材供應亦相當短缺。換言之，武肺疫苗要盡快生產，都會出現儲存唔晒、運送唔切等等嘅問題。講緊每個人可能需要接種兩次甚至三次疫苗，而稍後亦會有更強效果嘅疫苗誕生，同樣需要快速運送到全世界，整個物流過程會係長期作戰。
全球冇企業能夠一條龍處理整條疫苗運輸鏈，生科冷凍物流解決方案供應商CryoPort，業務極偏門但極專業，但遇着呢場史上最大嘅物流業挑戰，突然變成必要嘅一員，多間醫療運輸企業都要搵佢幫拖。CryoPort 8月收購一間以歐亞為市場嘅同業同埋一間醫療冷凍儲存設備嘅生產商，似乎業務踩過界，希望喺呢場疫苗物流戰大展拳腳。下期再講。
晉佳