上星期虛擬銀行話題圍繞匯立和Mox。前者推快閃高息活動，反應超預期令系統超出負荷，結果活動被腰斬；二是Mox正式登場，回應客戶訴求，加碼推出金屬卡，兩件事，體現出虛銀對待客戶的態度。
匯立銀行快閃活動拖冧系統，小編在社交媒體逐一回覆用戶留言，CEO透過電郵向受影響用戶道歉兼送voucher，態度認真，而且比傳統銀行更謙卑，值得畀多次機會。
同日渣打、香港電訊、電盈及攜程合營的Mox開業。銀行數月前搞活動，話首3,000名搶先登記用戶可獲發金屬黑卡，結果登記完一直無消息，登記唔到黑卡又嘈爆。銀行開業即宣佈金屬卡名額加碼至2萬個，已預先登記嘅開戶後都有份，正當杜夫人都以為銀行可以成功補鑊之際，討論區竟然出現另一種聲音，要求銀行補償首3,000名忠實擁躉。唔知Mox會點拆局。
上周話題唔止咁少。話說工銀亞洲挑機，日前推出手機銀行多人同行「e開戶」優惠，3個月港元定存息率高見10.8厘，條件係10人分別拎8萬蚊出嚟開戶做定存。曾經有用戶投訴過工銀亞洲手機銀行資金易入難出，肯為你冒險揀宇宙大行開戶嘅，一定係出生入死的好知己，留意返「十人行優惠」名額只得一個，仲未湊好人數就走寶了。
有人話虛銀無料到，服務唔夠撼動傳統銀行，難改變市場生態。杜夫人唔係咁睇。傳統銀行減服務費用、搞花臣推優惠，好戲隨時在後頭。
港視（1137）創辦人王維基曾經講過，好多人一生都話無可能，而佢嘅堅持證明大家錯了。態度決定成敗和命運。虛銀，唔試過又點知啫？
杜夫人