西甲勁旅巴塞隆拿喺上周六同西丙球隊塔拉戈納踢咗場季前熱身賽，喺新帥朗奴高文帶領下，球隊改踢4-2-3-1陣式，最終巴塞以3:1輕鬆取勝。今場亦係美斯鬧離隊風波後，第一次代表球會上陣嘅比賽。球王以隊長身份正選上陣踢咗45分鐘，比賽時面帶笑容，仲要有12碼機會都唔射，將操刀機會交畀基沙文，睇嚟已經冇再為早前風波而唔開心。
巴塞上屆歐聯8強慘被拜仁慕尼黑8:2血洗後，效力近20年嘅美斯亦心灰意冷決意離隊，仲鬧出合約風波，幸好美斯最終決定留低先平息件事。球隊仲搵咗向來以鐵腕治軍聞名嘅高文代替施迪安領軍，有指佢上任就講明唔會畀美斯有特權，仲想唔畀佢繼續做隊長，不過最終熱身賽賽前，球會宣佈美斯繼續係下季嘅巴塞隊長。
今場熱身賽係高文執教巴塞嘅第一場賽事，向來踢開4-3-3陣式嘅巴塞，今仗就排出一個4-2-3-1雙防中陣式，基沙文一如之前報道，擔任「9號位」中鋒位置，美斯就踢攻擊中場負責支援。雖然美斯喺之前歸隊獨自訓練時全程冇乜表情，心事重重咁，不過有指佢歸隊後已經自己加操想快啲重拾狀態，佢今場比賽時仲不時笑笑口，睇落心情唔錯，應該冇再為離隊風波耿耿於懷 。開波只係五分鐘，上季大部份時間養傷嘅奧士文尼迪比利就喺禁區射入先開紀錄；17分鐘，巴塞獲得12碼機會，以往有極刑機會一向都係由美斯操刀，但佢讓畀今季改着7號嘅基沙文，唔知係咪向對方示好。基沙文亦不負所託射入，巴塞以2:0領先。其後塔拉戈納守將邦尼拿後上遠射得手，為球隊追成1:2。
巴塞半場換晒全部11位球員，美斯亦都退下火線，由從拜仁慕尼黑歸隊嘅菲臘比古天奴同法蘭基迪莊作為重心，51分鐘巴塞再獲得12碼機會，今次由古天奴操刀射成3:1，為高文帶嚟上任後嘅首場勝仗。美斯上陣雖然冇波入，但另外3位身價加埋近4億歐元嘅進攻球員就各入1球，唔知會唔會稍為令球王對新季有更大期望。值得一提嘅係早前傳高文想清走嘅兩位老將蘇亞雷斯同維達爾，都冇被列入大軍名單，睇嚟兩位都係等緊正式離隊。
賽後高文接受訪問時亦有提到球隊陣式上嘅改變，仲叫球迷要習慣吓球隊嘅新風格：「同球隊幾年前相比，呢種踢法可能會比較着重防守多少少，但呢樣可以更有利傳球同保持控球在腳，亦可以為中前場創造更多空間。我相信球隊可以適應新陣式，因為我哋球隊嘅中場球員都具備呢方面嘅質素。」