巴黎聖日耳門（PSG）球星尼馬，早前踢完歐聯決賽，去西班牙度假返嚟就感染武漢肺炎。好消息係尼馬喺上周五宣佈，自己喺新一輪檢測結果中已由陽轉陰，仲已經返訓練場重投操練。另外，呢位早前同「一剔牌」結束15年合作關係嘅巴西前鋒亦都落實轉倉同「豹牌」簽約，成為呢間德國運動品牌贊助商旗下嘅代言人。
尼馬喺官方twitter出文，上載一段加盟「豹牌」嘅官方短片，並留言寫「The King is back！（王者回歸）」，介紹自己已經同新贊助商成為合作夥伴關係；隨後「豹牌」亦都喺twitter出文，歡迎尼馬加盟。尼馬喺未成為職業運動員之前，就已經同「一剔牌」簽約，雙方合作咗15年，尼馬上月就突然宣佈同對方「分手」，原因就冇講到，當時已經傳佢將會同「豹牌」簽約，事件之後兩星期，雙方就正式公佈成為合作夥伴。
尼馬喺2011年同「一剔牌」續約，據報雙方簽署咗為期11年、總值高達1.05億美元（約8.1億港元）嘅合同，即係每年可以賺成955萬美元，未知過檔「豹牌」後，呢位巴西球星會唔會收到更高嘅贊助金額。「豹牌」目前旗下嘅運動員，除咗有同樣係足球界嘅阿古路、基沙文同前巴塞隆拿隊友蘇亞雷斯外，仲有退役牙買加「飛人」保特、平治車隊嘅6屆F1總冠軍咸姆頓，同埋NBA湖人球星古斯馬（Kyle Kuzma）等。
另外，尼馬日前都宣佈自己已經從武肺康復，喺新一輪檢測結果呈陰性，已經回歸操練。PSG喺上周四新季法甲第一場聯賽，因為陣中有包括尼馬在內多達七人中招，結果呢場作客朗斯嘅比賽爆冷以0:1落敗。PSG下場會喺今日返主場迎戰馬賽，教練杜曹日前暗示迪馬利亞都有機會復出，不過亦擔心呢班啱啱康復嘅球員，已經有兩星期冇參加操練下，比賽狀態可能唔夠，所以尼馬要復出或者仲要再等等。
另外，新球季前冇乜買新兵嘅PSG，喺上周五宣佈由意甲羅馬借用費奧倫斯一年，仲有優先買斷條款。PSG季前有比利時右閘梅尼亞離隊，費奧倫斯正好頂替佢位置。