同英格蘭年輕中場菲爾科頓過咗一晚嘅冰島索女蘿亞，喺訪問入面詳細講當晚狀況，話表姐娜迪亞喺交友app上識咗曼聯前鋒格連活特後安排見面，娜迪亞喺酒店7樓租咗間每晚55鎊（約550港元）嘅房，「三獅軍團」就入住嗰間酒店三樓房間。蘿亞喺前個周六午夜接娜迪亞去酒店後，返去途中接到娜迪亞電話，話一位叫「菲爾」嘅球員喺度，問佢有冇多個朋友。蘿亞仲話︰「我喺電話度問係乜水，菲爾因為我唔認識佢嬲豬。之後我喺ig睇吓佢咩樣，然後我同意返酒店。」佢仲大爆房錢係佢自己畀，原本話畀錢嘅科頓最後仲走數。
蘿亞沖完涼之後同大家傾咗偈半個鐘，科頓就要求去佢間房，二人大戰過後，格連活特同娜迪亞就過咗嚟佢哋間房，之後格連活特就話好攰要返自己房休息，蘿亞記得科頓當時同佢講︰「佢話佢度過咗愉快嘅時光，然後錫咗我一啖就走。當時仲叫我發短訊畀佢，我就話好。」兩位女士喺清晨六時被英格蘭保安團隊敲門聲嘈醒，仲衝入嚟搵兩位英格蘭球員。事件曝光後，蘿亞嘅生活翻天覆地︰「我媽媽好震驚，因為我張相出現喺冰島嘅所有報章。我爸爸同兄弟就話我與敵同眠，因為佢哋係阿仙奴球迷。」