都說早出道有早出道好，蓋世寶今年才41歲，穿起熱褲露了丁點腰間肉，眼前的LuLu姐姐還帶點辣。蓋世寶的笑聲很爽朗，是她今天的設定，「你哋成日見到我喊，係因為我個人激動！今日我就肯定唔會喊，我要畀大家見到我係笑！」
話說「成日見到佢喊」之由來，是去年離開工作了23年的無綫後接受訪問時的狀態，「我對上離開嘅訪問，香港都仲係幾好，我話只要肯做，其實唔會餓死，但係𠵱家我想收返，香港真係差唔多會餓死，𠵱家我真係要思考點樣搵食喇！」
經歷三代兒童節目，睇《傳真機》長大的細路，如今都快高長大，蓋世寶卻像長生不老的LuLu姐姐，看着一代一代人成長，LuLu姐姐依然是姐姐。假如《傳真機》不死，蓋世寶說，她願意做足一世的。不過世事難如人願。
「其實我唔慘喎，我一日仲有選擇，我已經幸福，最唔幸福就係你冇選擇！」做個永遠的LuLu姐姐，「可能啲小朋友叫咗姨姨先，我都接受㗎！」但願青春常駐，叮噹不要老。
叮噹也要食飯，蓋世寶這個月正在思考要不要轉行賣保險。
撰文：文嘉龍
去年3月離開無綫，眨眼經已年半時間，蓋世寶回頭看，依然對離開的決定無怨無悔，「通常啲大決定，我冇後悔！早知食包薯片啦，原來賣晒，呢啲小決定梗係會後悔，但係大決定，我通常都諗得好清楚。」
心態決定一切，離開未必一定海闊天空，但至少心安理得，「主要係個心境同心態，自從我呢個決定之後，我人生嘅路都係我揸主意，話事權畀晒自己。」蓋世寶說，去年離開無綫之時，也未有認真想過轉行的問題，反而在這幾個月，香港和疫情的問題，倒令她開始認真好好思考。
「我諗大家都好有感受，好多行業都受影響，我哋呢行除咗電視台叫做有工開，其實行內人好多都冇工開。我呢個月深深思考過，到底應該點行？呢個疫情，有冇第四波、第五波，冇人知道，所以好長遠嘅計劃，我不嬲都冇亦都覺得唔需要，因為你計唔到，但係轉唔轉行，我覺得開始真係要諗。」這段時期，有不少朋友都叫蓋世寶不如轉行做保險，「我考慮中囉，我想過埋今年先至真正可以有個清晰決定。」
拍完香港開電視的《一曲走天涯》，新節目亦因疫情停工，沒有工開的日子，蓋世寶宅在家，慳得就慳。「其實呢幾年我已經係咁，你知道自己收入唔穩定，你咪慳啲囉，但係女生都要有一啲使費，我算比較慳，我又冇去做facial，我又唔喜歡gel甲，已經慳咗啲啦！」
人生第一份正式長工就是無綫，中學畢業投考藝員訓練班，自此一待23年光陰在一間公司，「十幾歲畢業，屋企家境真係唔好，我就想快啲出嚟做嘢幫補吓，嗰時仲係睇報紙搵工，我打咗好多個電話，有一個請我喎，返工叫我做接電話，我返咗一日定兩日，好快就走，我覺得佢哋係呃人嘅公司，以前好興嗰啲model公司，跟住我仲做過M字餐廳（麥當勞），我做咗幾日，那邊廂我依稀記得見到雜誌有招募（藝訓班），跟住又竟然有反應喎！」
訓練班一畢業即有機會加入兒童組，蓋世寶成為LuLu姐姐，經歷了三個朝代，由《閃電傳真機》、《至Net小人類》做到《放學ICU》，接近20年的兒童組生涯，可說是蓋世寶的安全島。「𠵱家諗返梗係一個好好嘅機會啦，我都唔知點解會做咗咁多年，諗返轉頭其實我係好彩，學咗好多嘢自己袋咗，好老土咁講，可能係畢生受用！」至少，在兒童組的世界，不像戲劇組般要靠擦鞋埋堆，「我嘅性格點到即止，熟嘅人就知，唔係好熟嘅時候，其實我真係hi bye完就冇，係好冷漠㗎！」
有底薪有騷爆，安安穩穩以為可以無憂無慮，「長期爆騷，我諗收入叫做正常同合理啩，行外人會以為我哋搵好多！我諗有兩萬幾，大概咁上下啦，一個人慳慳哋，以前OK㗎！」誰不知，一朝天子一朝臣，2015年綜藝科高層余詠珊手起刀落「滅組」，不是余氏馬房的人全部冇得留低。
「傳就係咁傳啦，嗰次連幕後都滅晒㗎，淨返一個。好震撼成件事，我都要消化幾日，我哋其實有心理準備將會冇咗個節目。講到明，開咗個記招去招募其他主持，佢招募年輕嘅兒童節目主持人，我唔係年輕啦，同埋佢連最大嗰個都郁咗，我又點會留低呢，呢個又好合理，所以我哋有晒心理準備。」最徬徨時候，蓋世寶硬住頭皮打電話給戲劇組監製，「我搵咗潘嘉德（無綫前監製），我差唔多淨係識佢，以前合作過《大冬瓜》。我話，『德哥，我調返出嚟，你有乜角色可唔可以預吓我』，佢真係有預我開戲，拍咗《拆局專家》，其實我好多謝佢！」
拍過幾套劇之後，蓋世寶試過有段時間足足9個月冇工開，原來白𢭃人工的滋味也很難受的，「我有啲唔好意思，我出緊糧受緊薪，但係我又唔使做嘢，個心情好矛盾，其實你有糧出而唔使做，應該係好爽，但係你個心情好忐忑，等幾耐呢？最大壓力來自媽咪，佢問我冇工開呀？我都唔知點答佢！」之後即使有工開，但接到的角色可有可冇，蓋世寶試過在《BB來了》得返一句對白，她開始知道，是時候離開了。
「最尾嗰套係《她她她的少女時代》，其實之前有一套《BB來了》我已經覺得唔係好對路，我真係得一句對白。我唔係等一個機會爬上去二線、一線，我要爬，我一早好進取啦，我真係一個打工仔心態，不過我覺得要由零開始，我點對得住自己，我覺得太唔合理。我有個心態就係『我喺度做乜』，返到去化妝間，人哋問開乜呀蓋世寶，我話做阿邊個個同事囉，咁即係冇嘢搞啦，我話係呀，普通妝得㗎喇！成日都要答呢啲問題，我唔係介意答呢啲問題，但係你個心態好無奈，老臨可能都有嘢發揮呀，其實幾唔好受㗎！我已經二十年，隔籬嗰幾個可能五、六年，佢哋都唔好受，何況我，我一收工即刻離開，我當自己冇返過工，我催眠自己冇返過工。」
原本以為可以一世做LuLu姐姐做到老，結果離開前的底薪減到得返七千，「唔調我出去（調離兒童組），我咪繼續做囉，我未結婚我都仲係姐姐，後期好多哥哥姐姐都結咗婚！其實我真係冇乜所謂，你唔嫌棄我，我咪繼續做囉，我好簡單。」但世事就是如此複雜，永遠不似預期。
身邊兒童組的哥哥姐姐都結婚了，蓋世寶圈中的兩段情，第一段和鄧健泓；第二段是和林遠迎（藝名林景弘），兩個前度都先後成家立室，而林遠迎當年更曾向蓋世寶求婚但遭拒，雖然如此，蓋世寶與兩位前度依然再見亦是朋友。「我喺呢十年八載思考過，點解人人都結婚，點解我唔結呢？婚姻或者一個家庭，原來根本唔係我想要嘅一樣嘢，我二十幾歲嘅時候想㗎，以前一直覺得女仔應該二十幾歲就結婚，隔一陣就生小朋友，點知撻完Q又再撻Q，跟住覺得原來我唔係想咁樣！我唔係想自己一個，而係我唔係好想要一段婚姻，我唔係好恨嫁囉！」
蓋世寶的父母在她小學的時候已經離婚，媽媽一手帶大她四姊弟。是否父母的婚姻令她留下陰影？「我覺得唔係好關事，因為我三個兄弟姊妹都結晒婚，所以呢個係個性！第一我媽咪冇話怨天怨地，佢係天跌落嚟當被冚，我好多時處理或者所謂睇法，其實都係喺佢嗰度啟發。媽咪都咁樂觀，佢有好多座右銘畢生受用，人比人比死人呀，總之好多呢啲老土說話，其實我都係咁樣大，心底裏面裝住呢啲說話，所以我咪好似好平和囉個人，我根本就應該出家㖭！哈哈！」爸爸好早已經另有家庭，去年蓋世寶離開無綫時，她爸爸都有致電聯絡她，但她說與爸爸的關係，就像好少聯絡的親戚朋友般，她說：「好陌生囉！」
追求自己人生想要的，蓋世寶自己一個人生活也活得開心，當下只想身體健康，「我想睇吓個疫情緩和返之後，到底係點樣呢？全個行業點樣呢？𠵱家我覺得人生身體最重要，我之前就係諗捱到今年先算啦，你唔知自己幾時有事，我反而諗點樣去保護自己，我已經習慣咗保護自己，口罩直頭係身體一部份！」
面對疫情和逆境，其實只想維持到生活，「最想我嘅工作量可以承受到我嘅生活費，我咪會繼續做囉！點解我𠵱家會思考我嘅將來，就係因為我冇收入，呢個疫症冇收入，就係我要思考嘅原因，好現實㗎呢個世界，你要生活就要有工作，有工開係最基本想要嘅嘢！」
人人有工開，看似基本卻似奢侈。
訪問全程，蓋世寶都保持開朗，難受的事情都可以嘻嘻哈哈帶過，不過說到幾個月前離世的愛犬「咆咆」，始終意難平。
「咆咆16歲，以前有隻摩天使都走咗，咆咆感情好好多，所以好大打擊。如果將咆咆呢件事，同工作比，我覺得呢個係大件事！呢兩年裏面，人哋眼睇可能係離開咗TVB好大件事，我嘅大件事其實係我隻狗走咗……我喊咗好耐呀，我睇親相就喊，我失眠咗成個月，天光先至瞓得到，滿腦子都係佢，我成日諗佢去咗邊，到底去咗邊呀？可唔可以話畀姐姐知，我不停研究緊佢去咗邊，跟住上網睇吓啲狗仔離開之後係去邊，不停諗！但係唔代表我唔識move on，大家安慰嘅說話都係要過生活，我梗係明，但係我唔可以當冇事發生。」