較早前楊明與黃店老闆合照，後者展示五大訴求缺一不可手勢，網上瘋傳，這位藍絲藝員被同路人罵個半死，他才知中伏，反擊：「五個一排，全部拉晒」，女友莊思明措詞更強硬：「賤人就係會用賤招去害人，得啲白癡先會信你哋。」這句話連自己男友也罵上了。
楊明自稱中學時期愛踢波，受傷入院才掛靴，去年他到哥倫比亞拍攝節目，也入場觀戰。得喇，係人都知足球係你朋友，既然咁有緣份，唔好畀佢停，展示五一手勢的黃店老闆章偉鎽正是前職業足球員，兩個月前還是甲組一分子。黃藍相距很遠，但足球世界好細。
撰文：陳勝藍 攝影：董立華
事發8月30號，紅磡黃店興華門口泊着楊明的房車，老闆章偉鎽心忖對方不久前醉駕被捕，怎麼又享受駕駛樂趣？但見主兒從對面便利店從容步出，卻不由得不信，小小黃店真的成了「楊明」山莊，22歲的他膽粗粗上前問：「唔該可唔可以同你影張相？」對方答得爽快：「可以，可以！」據悉當時對方狀甚欣喜，「我仲同佢講：『戴住口罩都認得你，你咁靚仔！』佢笑笑口點頭，好開心。」
反而阿鎽覺得尋常合照太沒趣，隨便做了個手勢，右手開晒，與左手食指相對，旁邊那位怎想到駕車失事，影相都會出事，「佢應該睇唔到我做乜手勢，佢唔會望我嘛，跟住佢豎起手指公。」就這樣，黃絲的五不缺一與藍藝人的直豎拇指偶然遇上，可能是香港敵對色彩最融洽的合照，之後楊明逐一招呼店中各人的相機，但雙手再沒畀like，其他人也不像阿鎽貪玩，不作手勢，「跟住我就post咗張相出嚟，件事就係咁。」
這位黃店老闆發文：「開店接近一個月，第一位偽人嚟捧我哋場，多謝手足撐我哋！」有人真的以為楊明變節，加持黃店，罵道：「講醉駕咁清晰，影張相就咁含糊，想食兩家茶禮！」章偉鎽沒想過「楊明」立萬，冷不防相片掃下17,000個like；他坦言並非存心設伏，不想陷對方於不義（或者正義），之後在圖下補充事件始末；對於莊思明大罵「黃絲賤種」，他說：「我都明白，佢哋身為明星一定要澄清，擔心斷財路嘛大佬！」至於楊明回敬「五個一排」，應如何賞析？「藍絲鍾意點諗就點諗，佢哋話隻馬係鹿都得啦！」
興華設在紅磡差館里，黃店碰上皇氣，甚麼回事？「我朋友都係咁講！呢度真係好多差佬經過，平均一個鐘幾架警車。」資料顯示，1872年紅磡警署座落差館街，後來改名大沽街，警署亦遷移，但附近這條橫街得以保住差館里名稱，「聽講好多差佬經過呢度返差館，所以叫差館里。」說紅磡新店之前，必須交代柴灣舊店，興華二邨興華茶餐廳，幾十年來阿鎽的媽媽當家主事。
地區有分生水、死水，銅鑼灣、尖沙嘴、旺角就是生水，區外人也來消費，死水則只有街坊生意。
興華二邨位於柴灣西南隅，再往南走就是歌連臣角火葬場、墳場，地勢又高，是死水中的絕地，就是柴灣人也往往不知這裏有間茶記，向來是邨內老街坊打躉之所，熟客可以自行轉電視台那種，一天下來生客不到20個。老闆娘閒來與其姊，即阿鎽姨母在店內打牌，三隻雀腳，缺一不可，街坊湊數落場，食客品評戰況，可以想像中發白打出會大叫：「咁生都打？」日子逍遙有如意大利小鎮，直至去年夏天，政治硝煙吹到死絕之地，原來阿鎽將老店披上一抹金黃，文宣處處，老一輩水土不服，有人轉看無綫新聞，邊看邊罵抗爭者，老闆娘破題兒第一次搶過遙控，罵道：「唔鍾意就唔好再嚟！」麻雀144隻，只有三萬令人歡喜令人愁，小小店子載不下很多愛恨，興華從此沒再傳出洗牌叠牌之聲。樓下辦館東主本是熟客，老闆娘入去買東西，未料自己成了中發白，顯得生外，東主不理睬她。老街坊本來走一個少一個，去年集體離場，人情生意同歸於盡。
老闆娘真有性格，原來乖仔替她like盡「黃頁」，她一看便是幾個小時，阿鎽解釋：「因為like咗好多page，淨係《蘋果》都有排睇，我訂咗好耐。」未幾興華黃店之名外傳，柴灣人上山搵食，「二、三十人門外等位，開張幾十年未試過！」有人從深井、元朗過來，花十多元食個包；招牌雞髀更成了柴灣名物，炸到金炸到黃，好食與良知齊備，「舊店出咗炸髀四、五年，以前平均每月賣唔出十隻，而家一日都賣五、六十隻，最高峯試過一日賣百幾二百隻。」
舊雨過去，新知淹至，「門口要等位，自然嘢食等得耐，有客人等一個鐘都未有一碟乾炒牛河，佢發脾氣。」這位顧客真是性情中人，破口大罵：「等咁X耐，唔食呀！」話雖唔食，臨走擲下幾百元飯錢，小店請求他收回，好漢子頭也不回：「你唔要，幫我掉出去！」等得久因為人手少，伙記（手足）缺一個，老闆娘頂一個，缺兩個頂一雙，今次她便無暇受訪，以上資料由太子爺提供，他說：「以前覺得好悶，對呢行冇興趣，我諗住職業一係踢波，一係消防員，到阿媽退休唔做，由得茶餐廳執，冇諗過接手。𠵱家一來受到姨媽所託，二來有同路街坊捧場，無論如何要守住間店。」
媽媽與姨母都支持章偉鎽的足球夢，兩年前小子果然成為職業足球員，加入晉峰足球會。隊中有名字冷門的他，以及很常撞名的李志豪（不是港隊那位）、戴思聰（不是劉德華、黎明的唱歌老師）。楊明主演《機場特警》，一名隊友的正職就是機場特警，據網上起底這人兼任速龍。謠言作不得準，阿鎽挖空心思試探，將速龍打人新聞傳到隊友group，點名那隊友：「你喺咪到呀，有冇返工？」平日又問：「你噚日打人點呀？你成日出街打人？」「你做差佬好開心喎！」對方輕輕帶過：「嘿，X你啦！」
去年9月1號網民癱瘓機場交通，赤鱲角半晝孤島後警方清場，阿鎽剛巧送機，對那機場特警明嘲暗諷：「咦~你今日唔使返工咩？一陣睇住我哋，唔好亂咁打人！」球隊訓練三人一組，每當與這個藍人同組，阿鎽腳底抹油；全隊拍照又刻意遠離此人；搶球時刻意勾跌阿sir，對方笑說：「X你！」每次一X泯恩仇，記者讚這位警察球員脾氣不錯，阿鎽卻說：「佢只係厚面皮，唔係脾氣好，佢比賽時經常燥底，但唔想隊友間搞到咁僵。」
記者問章偉鎽何故深黃，他答：「黃？有批判性思考就黃。」他在社運期間早上練波，夜看街頭燈火闌珊。楊明有份演出《愛．回家》，當時阿鎽每晚都能回家，不曾五個一排，只是球員生涯受考驗，「三、四點回家，第二朝起到身練波，頹啲咁練，主要係心情頹，你見咁多手足被捕，見到爆晒眼，流晒血，第二日邊有心情練波？」他司職中場防守，本應是全隊跑動最多的一員，結果是最頹的一個，入球也不慶祝，隊友問：「你搞咩？」生活完全圍繞抗爭，日子如夢似幻，一天女友通知他：「噚日係我生日。」
爸爸早逝，媽媽勞碌半生捱大兒子，誰願放手？「佢見到有人流血、爆眼，好驚自己個仔係下一個。」姨母患癌，半夜在醫院也打給阿鎽：「返屋企未？安全未？」又叮囑：「做咩都好，最緊要睇住自己！」到得後來病毒抬頭，爬山不再，港超也暫停，他說：「做咗全職足球員兩年，疫情之下，幾鍾意踢波都冇得踢，我而家覺得冇踢波冇乜特別，我以前一直唔敢想像我唔踢波。」
那時他與隊友戴思聰及兩名友人籌劃差館里小店，似為命運作綢繆，未幾球隊終止章、戴合約，無關政見，畢竟隊中黃人不少，「職業足球員我做咗兩年，已經冇追求，我睇化咗，到你做到，覺得咪又係咁。」掛靴不足惜，只可惜兩個月內兩個姨母因癌去世，見不着他做小老闆，包括社運期間住院也關心他安危那位。媽媽一直打拼小店，較少工夫帶孩子，這個姨母成了半個母親，早年帶小伙子去足球訓練班；旅行總是一起去，有次在海南島坐船，姨母吩咐導遊安排蛋糕，慶祝小子生日，其實當時壽星仔凍到震。歲月流轉，昔日片段仍在心內逗留。
說吸引力法則亦可，同病相憐也行，訪問前兩周記者姨母離世，只是我不及阿鎽透徹：「𠵱家香港咁樣，我好似對生離死別睇化咗，陳彥霖、周梓樂或者好多手足，咁後生死咗，我對生死好似睇化咗好多。」