中國大舉慶祝抗疫成功，褒獎功在國家之醫護、科研人員，目的明顯不過，就係向全世界宣示，中國係第一個有疫情嘅國家，亦係第一個有辦法抗疫成功，科研有成就，可自製疫苗兼係全球醫療物品生產大國。
中國模式，在其他地方，絕對不易模仿。即使俄羅斯老大哥亦搞唔掂。全國封城、封關、封區嘅措施，大概只有北韓可以同樣做得到，西方國家人民，因自由開放慣性，冇咁易受控制，西班牙意大利封城初期，新冠疫症咪一樣上升，去到印度呢啲宗教信仰大過天嘅地方，議會政治選出嚟嘅政府好難有威權施展極強硬手段嘅。喺美國，莫講特朗普唔想，即使拜登上台，用中國嘅強硬手段治疫，美國發生內戰都似，素來崇尚個人自由嘅瑞典，索性順其自然，「佛系治疫」，人民唔反對喎，如果有中國人話瑞典傻仔，瑞典會話番中國人馴服過份。
中國人好食，疫情過後，又忘記武漢教訓，雖然中央明令禁止吃野味，殺野生動物，但《南方日報》報道（見信報9月7日A15版），廣東省清遠、湛江、江門等地野味生意死灰復燃，有商家售賣野生眼鏡蛇、石金錢龜、馬蹄蟹等，以治癌、排毒用途作招徠，湛江雷州市更大膽，捕捉受保護瀕危藍血生物「鱟」，有六間餐館以「鱟」為主打菜品，公然屠宰。
喜歡嗜吃野味，是否中國人民族性？自袁國勇教授慘遭老粉紅、小粉紅，香港藍絲狠批之後，學者已無言論自由，唔敢再講。唔講理論睇事實，廣東人不理中央禁令，敢捕敢賣敢吃，全不理會禁令，直情係民族性之一種啦。習近平一講再講共產黨教育都冇用，求神拜佛佢地唔好食出個大頭佛，等WHO總幹事譚德塞預言未來必有新款流行病疫，成為事實！呢啲嘢講得多，唔知會唔會畀高官話「別有用心」，現在流行指鹿為馬，講吓三權分立都會畀高官扣帽子，「居心叵測」、「抹黑中央」、「為反對而反對」；中聯辦港澳辦發文話香港從來冇三權分立之後，即刻有人講到「愈辯愈明」，小市民聽了，再看兩辦文章，直情係「臨表涕泣，不知所云」。