【名家足路】
【對決場次︰富咸vs阿仙奴】
新一季新人事新作風，《蘋果波經》都搞搞新意思，每個周六都會有上月擂台盟主同上月燈神以波會友，無他嘅，都係想幫讀者贏錢，得啖笑得嚟又無傷大雅。小弟上個月輕鬆贏咗個盟主位，新嚟新豬肉，同「燈神」尊嘉揀咗英超開鑼戰、富咸對阿仙奴嚟拗吓頸，佢就唔睇好阿仙奴喇，今日7點半開波，一於食住飯撐兵工廠。
阿仙奴（圖）呢期都幾順，連贏英足盃同社區盾你未必覺得佢真係好勁，不過就真係睇到領隊阿迪達喺度做緊嘢，一前一後簽咗韋利安同加比爾馬加希斯兩件巴西兵之餘，借兵丹尼施巴路斯又肯踢多季，仲有，斷估唔使再賣隊長，槍手未開季士氣已經有喺度，加埋槍手人腳其實都齊章，奧巴美揚未開季都熱晒身，就算上季英超作客贏得四場今場都要信，做住幾粒鐘榜首先啦。
雖則阿仙奴上季英超真係麻麻，作客更加冇眼睇，不過第一場對手、「升班馬」富咸又唔係咩好嘢，呢隊倫敦球隊近年都做慣「升降機」，前季使大錢最後降班真係笑咗，睇番富咸個球員名單，大名嘅就係得個阿歷山大米祖域，呢個大隻佬喺英冠尚且可以也文也武，但前季，即係降班嗰季都係入得11粒，仲有，呢個塞爾維亞前鋒係正宗臭馬，拎黃牌多過食飯，點信得過呀？
點都好，呢場阿仙奴條氣係順嘅，作客讓一球應該冇乜大問題，新欄第一炮，希望槍手幫到手。
文：守丹
《一燈決》係今季新欄目，由上月擂台盟主同上月燈神拗吓頸，睇吓讀者信邊個。