每次到IFC嘅city’super買麵包，都要排隊畀錢，買多啲其他食品、用品，更要到另外一條長龍排隊，過場到圓方，ThreeSixty亦係差不多一樣。
如此情況，當然反映在零售數字上，零售業好差，超市獨大，睇七月份零售銷售總額係265億元，按年下跌23.1%，其中跌幅超過50%嘅貨品類係珠寶首飾、鐘錶及名貴禮物，跌53.7%：藥物及化妝品，跌50.9%；升得最高嘅係超市，升26.5%，稍稍上升嘅係燃料，升3.8%，其餘各類皆跌，衣物鞋類及有關製品都跌53.6%，數字清楚顯示，民以食為先，在疫情未受控制，出外飲食有限制，宅經濟盛行之時，市民唯有多到超市買食物，現在超市已經好似一個小街市，一啲連游水魚都有得賣，反而濕貨街市嘅衞生狀況有疑慮，導致家庭主婦避之則吉。
訪港遊客數字慘淡，內地自由行遊客絕迹，高價貨如鐘錶珠寶、化妝品等難去貨，自然不過。又因失業率上升，市民慳住使錢，百貨公司及時裝店已無吸引力，銷售量下跌係意料中事，香港家庭（劏房戶或除外）均有大量衣物鞋履存貨，最艱難時期，買少啲新貨係人之常情。
如果冇超市銷售量勁升26.5%，零售銷售量總額會下跌超過三成，直情係苦不堪言。
超市生意，一枝獨秀，另有數據可以佐證，政府統計處公佈2020年第二季家庭收入中位數（不包括外傭）係2.55萬元，較第一季下跌8.9%，與2003年第二季跌幅9.1%差不多，在2003年沙士期間，失業率上升，打工仔大幅度減薪，今年亦一樣。統計處之家庭收入水平戶最高一組係十萬元以上，第二季有19.79萬戶，較第一季減少12.1%；在不同家庭收入之中，上升得最多嘅一組係收入4,000元以下，比第一季增加2.95萬戶，真係唔恭喜，收入4,000-5,999元嘅增加25.1%，更加唔掂，高收入家庭戶數減少，低收入家庭戶數增加，點會刺激消費吖！基本上只能將有限收入用於食物醫肚嘅啫！唔怪得華潤要買city’super，不過買咗之後，最好唔好將後者「華潤化」。