全民檢測冇人去，特首林鄭月娥又一手炒起咗「香港無三權分立論」，建制陣營隨即被「激活」，不斷將精力花喺宣揚香港冇三權分立。可惜建制派嘅水平極待改善，話說因為喺立法會拉跌並拖行人民力量陳志全而被稱為「暴徒先生」嘅工聯會郭偉强，前日喺社交網站話三權分立係「井蛙之談」，又比喻三權如三頭馬車，如果馬車「互相衝擊，各行各路」，咁唯一後果就係分屍。究竟有冇人真係明佢噏乜？
郭偉强嘅帖文前日出咗，到噚日先變成連登熱門。佢話三權分立係「象牙塔內的井蛙之談，脫離現實」，咁怕且好多人都係井蛙，包括前政制局局長林瑞麟、仲有1997年嘅香港政府。
至於「三頭馬車」嘅比喻就真係出色，既「互相衝擊」同時又「各行各路」，究竟三頭馬車嘅係向緊乜方向行呢？有網民都留言問：「你知唔知自己講緊咩？」、「從你嘅言論，睇來你真係唔係好明」，甚至有網民突破盲腸：「藍絲永遠錯在用錯誤類比去做說詞。」點都好啦，郭偉强最後都話「絕無懸念，唔好話唔明。」