勢估唔到會嚟到呢一日，警方凌駕證監會同港交所參與資本市場監管，行外人史無前例踩晒過界，可以話係最令港股投資者感到消極嘅一日。呢一刻警權嘅走勢，仲勁過之前嘅Tesla，完全估唔到頂，殺入資本市場之後，已經估唔到下一步會點做，成為市場最大不明朗因素之一。
壹傳媒（282）單嘢噚日下晝爆出後，連帶重磅中資股走勢都走弱。無計，又安全又透明嘅港股市場俾警權介入之後，以後中長線選股就收窄到外圍市場搵唔到替代品嘅股份，如果外資都係咁諗，每個外資揸少啲已足夠令港股估值再低一截。睇怕噚日嘅事，絕對係做多咗，談不上有殺敵嘅作用，但已自損三萬。
香港連番事件之後，整體估值勢將再拉低，舊經濟股最受創。美團（3690）等等嘅科技股升到爆廠，整固完成前難有好大動力推升股價。恒指月線圖走勢相當曳，7月反彈至保歷加中軸之後再向下，大成交之下未見轉強，後市有機會下探3月低位。長遠而言，港股好大機會步入類似韓股之類嘅長期估值低迷局面，明星股以外嘅股，似乎會一沉不起。
晉佳