還有四個月，天生童顏的關智斌（Kenny）便要迎接「39+1」，問及有甚麼人生大計，他一臉不惑，反而相信隨遇而安，堅信每天都做好準備，當機會來時就能發揮所長。至於感情，曾經跟張敬軒成為密友，但及後降呢做回朋友的Kenny坦認害怕闖情關；不想再傷心及付出，因此寧願選擇單身。
現年39歲的關智斌日前接受《蘋果》專訪，提到今年即將迎接男人四十的大關，他表示以前年輕時會給自己年齡立下框框，人大了，他才發覺一切不似預期。尤其感情更不能在控製範圍之內，四年前有指Kenny和張敬軒由「密友」降呢變朋友關係，近年他不但習慣單身，還享受單身。
現時感情觀是否有所改變？Kenny說：「我嘅mindset冇話要有年齡限制，𠵱家幾enjoy一個人，偶爾係會有寂寞感覺，但未必唔好，我只係選擇咗單身狀態，而唔係單身選擇咗我。」尤其那些曾經深愛過的人，嘗過戀愛模式，也受過傷，未必願意再花時間精神投入發展另一段新感情，Kenny坦言：「要調返去戀愛頻率，其實要花好長時間，唔想再傷心同付出，所以我會喺受傷害之前『落閘』，我會走先。」
Kenny知道自己要追尋一段怎樣的愛情，知難卻步，寧願單身：「𠵱家心態有啲攰，知道發展一段關係，係好甜蜜，但中間要磨合，我就少咗耐性。大家一旦dating，好驚超越界線（指由朋友關係升呢變情侶），我就會變成一隻兔仔，一驚就走咗去，反應好過敏。」Kenny笑言新歌《乾爹》正是自己心聲，他亦有留意大家愛用玩交友網解寂寥，建立虛擬愛情取代真正拍拖，友人還游說Kenny加入，他即使心思思卻未有實際行動。
有三個家姐、身為家中唯一男丁的Kenny可有被家人催婚？他坦認：「30歲時有催過，但𠵱家佢哋放棄咗，反而問我出咗家用未，拍拖嘅嘢冇得plan，要遇到一個人令我有心動嘅感覺，其實唔容易，當人越來越大個，𠵱家都唔知鍾意啲乜，起碼知自己唔鍾意乜，我唔鍾意一啲唔積極嘅人，或者人哋都有唔鍾意我，人揀你，你揀人。」
撰文：比華利
化妝：Elaw Wong of thelook-studio
髮型：SingTam of pi4.hk
服裝提供：DEMO、Sandro
