舊年8月30號大搜捕中被捕嘅黃之鋒，佢部iPhone XR被警察擅自破解，仲拎埋入面紀錄做呈堂證據。之鋒部手機輕易被破解，除咗差人用以色列公司提供嘅破解工具外，仲因為之鋒手機密碼只有四個字，自然好易破到！周庭喺Youtube 拍片講資訊安全措施，日前佢就玩突擊檢查之鋒嘅資訊安全措施，睇吓佢可唔可以成功擺脫「手機密碼只有四個字」嘅污名！雖然周庭發現之鋒部手機安全ok，但電腦密碼短到「一隻手數得晒」，又冇開VPN（虛擬私人網路），真係不完美，可改善喎。
喺條片開頭，一班之鋒嘅朋友已爆料，話佢以前冇乜資安意識，平時背囊、電腦周圍擺，搭Uber又開電腦做嘢，連載過之鋒嘅司機都留言認證，提佢要小心啲呀。不過周庭今次突擊檢查，之鋒就好有自信，仲話手機密碼已經有十個位以上，仲有英文字母㖭，相信都好難破解啦。周庭又拎住檢查表逐點問：加密手機、更新系統、關閉Google定位紀錄等等，全部都乖乖做足，睇嚟好安全咁喎。
手機資安就滿分，但電腦資安就有漏洞！一打開電腦，就俾周庭發現佢係用Chrome上網，而唔係用最有私隱度嘅Firefox喎。呢頭之鋒分享完佢有用外國VPN之後，嗰頭就自爆因為嫌上網慢，熄咗個VPN。呢個時候，周庭仲發現之鋒個電腦密碼短到一隻手數得晒㖭！一輪檢查之後，周庭畀嘅評語係僅僅合格而已。
李八方