雷前教授又出新口術，叫政府施打疫苗時只限參加過國家隊檢測者，將來再派錢，亦只會益這批自願撩喉人士，因為「其他那些人唔係好市民，佢地無參加，派錢就唔需要畀佢。」雖然過往雷前教授的「建議」，冇太大建樹，港府唔多讚。這是在国安法通過之前的香港，今時今日，前教授又好，假博士又好，牙力越來越強，明明天方夜譚的提議，都有機會落實。
這個「有差別」派錢方案，建制藍屍一早講過，強行推出，還有些少懸念，就係反覆檢測者，必然暴增，阿叔阿嬸口口聲聲為了揪出社區隱形傳播鏈，密撩當三餐，預計每多撩一劑就多嚿錢落袋。被藍屍視為黑醫護者勸退，藍屍講極唔會聽，集結在檢測中心內動粗，防暴奉召到「處所」執法，藍屍都照拉嗎？用元朗721那招拍吓膊頭，解決到？前教授的點子，等同「煽動好市民」去搞亂檔，以言入罪，管治常態，前教授落難的話，猜猜有幾多人聯署聲援？
一句講晒，唔捧國家隊就唔係好市民，從檢測自願到強制送中，路線已經硬性set好。2020年打後，只得新界鹿、九龍馬兩個身份選項，香港人，被消失。