新季英超今個禮拜開鑼，同過往開季唔同，因為上季收「咧」較遲，唞暑時間已縮短咗，好似雙曼要到8月中先踢完歐洲賽，差唔多等同西甲、德甲咁歇冬期咁短，另外因為疫情，以往強隊例必到亞洲、美國掘金，呢啲「搵錢式」嘅季前賽亦取消，而轉會窗亦順延至10月，除咗車路士外，各豪門暫時都未算有大手交易，大都維持上季原有陣容，可以預期季初病、新兵磨合等影響唔大，初步可秤先一眾強隊。
拍檔富仔今個禮拜就捧阿仙奴場，我當然就捧另一強隊利物浦；紅軍上季拎完冠軍，雖然盛傳韋拿杜姆會離隊，不過基本人腳同上季冇變，無疑社區盾表現較令人失望，但球隊逐漸上力，上仗大炒黑池7:2。「升班馬」列斯聯踢法其實幾似紅軍，都係高位壓迫為主，但英超同英冠球隊用波能力完全唔同，列斯聯喺英冠雖可呼風喚雨，但嚟到英超就不宜高估。紅軍首戰主場出擊，唔難贏列斯聯兩球或以上，讓得起球半/兩球。
其他賽事方面，紐卡素算係唔起眼但踢法實際嘅球隊，韋斯咸近季慢熱，信紐卡素作客搶到分，受讓平/半博下盤。下禮拜日熱刺主場對愛華頓，兩軍領隊摩連奴同安察洛堤都大有來頭，首戰料較為謹慎，[2.5球]入球「細」穩開。
新季英超點睇？當然係放長雙眼睇啦！因為真係好漫長嘅一季，感覺上冇停頓，連接住上一季，尤其係連睇足總盃、歐聯、歐霸盃、社區盾，感覺上係將兩個季度連接埋一齊，所以季初調整嘅時間亦都唔多，喺自己心水中，阿仙奴嘅變化係列強中較大，效率上極高嘅球隊，相反Big 6中最冇變化嘅相信都係熱刺，喺摩連奴手上都唔會睇到有乜特別嘅組合，進攻模式嘅變化亦唔會多，所以亦都係最唔睇好熱刺嘅原因。至於曼城上季始終都入過百球，火力就毋庸置疑啦！咁又有邊隊有機會爆出嚟呢？我就會揀愛華頓，事關我都幾鍾意占士洛迪古斯。
入正題，投資價格可升可跌，長線投資本人就建議買阿仙奴。好多時投注都係睇球隊狀態、數據，同埋心頭好，呢隊兵工廠由上季尾贏完足總盃，到季初贏埋個社區盾，個個殺得性起，想重奪失落咗16年嘅冠軍，係時候靠呢一班新紮嘅老虎仔！阿仙奴狀態fit到漏油，禮拜六作客富咸，數據上近三場對強隊都可錄得低失球數字，非常靚嘅數據，馬會開讓一球低水，有信心；另外愛華頓下禮拜日作客熱刺受讓半/一水位都差唔多，兩隊心水「讓球」過關，再整多條波膽2串3，用青蟹變帝王蟹（唔係金就紅）。
文：黃耀富
