現年35歲的宋熙年（Sarah）與42歲的陳智燊（Jason）於2016年結婚，兩年後誕下大仔Damon，最近再添新成員，細仔Jamie終於出世，約重6磅多。Sarah昨日在Ig貼出Jason擁着兩個兒子的溫馨照片，並留言表示：「歡迎我心愛的BB Jamie，能有你加入我們的家庭令我們感到幸福興奮，你對食物充滿熱情，肚餓時大吼大叫……我們將會一起經歷很多樂趣和留下許多美好回憶。」
昨日，Jason接受《蘋果》的電話訪問，他指細仔的英文名叫Jamie，不過中文名仍未想好，他表示：「啲相係老婆影，佢話太耐冇影相，所以拎起相機同我哋影咗父子相，影得好靚，我老婆真係好叻。」
談到再度做爸爸的心情，Jason開心地說：「冇生第一胎時嘅緊張，擔心係少咗，但疫情下去醫院生產，醫護人員照顧得Sarah好好，我反而係緊張點樣安全將BB接返屋企。不過生產時都有趣事，今次姑娘以為我有剪臍帶經驗，畀我自己整，我用右手揸鉸剪，好狼狽下做咗個剪臍帶儀式。」
Jason指Sarah和Jamie現時已回到家中，他說：「我哋啱啱返到屋企，以為成家返到屋企會輕鬆啲，點知原來屋企有個兩歲同有個初生BB，雖然係好熱鬧，但原來好攰。好彩哥哥向來黐我，Sarah就可以專心湊細佬。」雖然一人照顧一個，但原來都忙到踢晒腳，Jason續說：「時間唔夠用，我望一望個鐘都已經7、8點，夜晚搞掂完哥哥，再去攬吓細佬，咁就一日，真係好充實。」
