【本報訊】一哭再哭！香港仔鴨脷洲邨一名苦命爸爸蔡生，四年前長子患有杜興氏肌肉營養不良症（DMD），活到16歲不幸逝世，昨天同患此病的14歲次子康仔亦告身亡，「今（昨）朝凌晨佢瞓到成身汗，我抱起佢同佢抹身，佢吐咗啖口水就走咗！」康仔氣絕一刻，蔡生潸然淚下，心中默默祝願兩兒子在天家重逢，「噚晚兩兄弟已經一齊了」，脫離病魔折磨。
蔡生與妻子育有兩子，一家四口居鴨脷洲邨利澤樓一單位，他原任職廚師，妻子做食肆樓面。他指妻子家族有肌肉萎縮症隔代遺傳背景，兩人婚後驗過DNA，確保無問題才生育，兩子相距六歲，不幸兩子出生後均患上杜興氏肌肉營養不良症，蔡無奈說：「驗過冇嘢先生，但出世之後咁樣都冇計。」
他稱康仔幼時與普通小孩無異，「呢度走吓，嗰度走吓，係動作比正常小朋友差啲，又容易跌，之後去到八歲，企喺度都腳震，唔敢行，要坐輪椅。」兩夫妻只能豁達面對，蔡生辭去工作全力照顧兒子，不靠政府獨力支撐，「（政府）都無乜幫到手」。
蔡生指康仔去得好突然，前日早上6時許見他起床，「康仔話瞓唔着，想出嚟，我抱佢出廳食碎蛋治早餐，佢之後睇youtube，玩高達，冇異樣。」下午5時許，兒子坐在輪椅睡覺，「我以為佢攰，抱佢上床瞓，夜晚叫佢食飯，佢有小小反應話唔食，話好攰。」
至昨凌晨零時，蔡見康仔睡得滿身大汗，抱起他抹汗，「佢突然吐咗啖口水就走咗，可能係最後一啖氣！」四年內兩愛子先後離世，蔡生難掩傷感，慨嘆「一定有忐忑，走咗兩個（仔）」。
他表示，兩兄弟生前感情很好，康仔未病發時會為哥哥推輪椅，哥哥申請電動輪椅後，也愛載弟弟兜風。兄弟生前受病痛折磨，他盼兩子在天家重聚，「噚晚兩兄弟已經一齊了」。蔡指未來日子不好走，因申請不到綜援，妻子又工傷休養，蔡打算找工作維持生計。
「蘋果日報慈善基金」先遣關顧主任已派發兩萬元緊急援助金予「蔡爸爸」應急，網上捐款：http://bit.ly/applecharity