港姐朱千雪喺香港城市大學完成法律博士學位後去咗做大律師實習生，為期三個月，原來佢最近已滿師，正式成為大律師，喺資深大律師張健利嘅Denis Chang’s Chambers執業，喺該律師行嘅個人簡介中，朱千雪會喺民事同刑事案方面實習發展，簡介亦話朱千雪對家庭和婚姻事務、土地、侵權及人身傷害、合同和商業糾紛等領域具有豐富經驗。
張健利喺法律界固然係元老級人物，以往就曾經喺反對逃犯條例上發聲，而佢嘅Denis Chang’s Chambers入邊亦有唔少出名熟悉人權同憲法大狀，好似香港大學法律學院教授、名譽資深大律師陳文敏；經常打人權官司嘅資深大律師潘熙，相信佢日後都應該有機會接觸到涉及人權、憲法爭拗嘅官司。
雖然朱千雪正式投身法律界做大狀，但據知佢同大台嘅合約仲未完結，早排佢接受訪問時話過，希望可以低調處理合約問題，從佢嘅語氣，估計佢再現幕前做女主角嘅機會唔大，事實上做得大狀亦要顧及大律師嘅形像，始終同娛樂圈格格不入。
李八方