隔晚科技股繼續捱沽，Tesla單日急瀉逾兩成，幾個鐘頭成功炮製技術性熊市，場面悲壯，資金繼續流向舊經濟股，香港呢邊限聚令星期五放寬，食肆准四人一枱做生意，餐飲股偷步炒咗幾日，開始有點力弱，第二梯隊零售股如卓悅（653）、莎莎（178）、東瀛遊（6882），因為大家開始放眼重新開關呀、健康碼呀嘅消息，博服裝股追落後，佐丹奴（709）有得諗。
同其他零售股一樣，佐丹奴業績不堪一提，上半年銷售額跌44.4%至14.13億元，期內盈轉虧蝕1.75億元，致令股價直插至9年低位。從樂觀角度出發，最新手頭現金達10億元，佔市值近半，同時維持20年無間斷派息，令防守力更強，如今炒作催化劑在眼前，用1.25元作止蝕位入場，夠晒值博率，倘突破1.42元，量度升幅可見1.7元。
再加少少想像力，周大福家族乃佐丹奴最大主要股東，持股超過兩成，新近旗下新創建（659）出售巴士業務，大有重整版圖味道，以佐丹奴在東南亞及中東逾2,000間門市的龐大網絡，要搵中資買家接手實在唔難。堡獅龍（592）獲李寧入主後最多炒高6倍，佐丹奴一旦重演劇本，又係好戲一場。
唐牛