特首林鄭月娥雖然俾美國制裁，但竟然可以「亮相」美國著名主持人Conan O’Brien嘅talk show！不過就唔係真人，而係「紙板人」形式做座上客，仲俾Conan O’Brien寸佢「死刑樣」！
Conan嘅節目因為疫情關係，現場觀眾變晒人形紙板公仔。最新一集Conan就入去觀眾席搵啲紙板「觀眾」傾下偈啦，點知俾佢見到啲嘢——係一個黑口黑面嘅女人！望真啲，原來係777嚟嘅！Conan即刻將777拎出嚟示眾，拍檔主持人Andy見到個苦瓜乾樣，就話：「雖然望落唔似，但佢係黐線（nuts）㗎。」Conan仲話：「我做節目見到呢啲觀眾呢，都會望住佢心諗，其實點解你要嚟呢？乜你鍾意睇喜劇節目㗎咩？你個樣似係要判人死判咁喎。」有眼利網民就發現，紙牌張相來自上年9月777宣佈撤回逃犯條例嘅電視講話，唔怪得咁嘅樣啦。
Conan之後仲將777紙牌抱埋上台，話平時帶咗呢種觀眾上台之後，通常就可以贏得佢嘅心咁話，於是Conan就問：「佢望落有無開心咗啲？」攝影師即刻放大777個樣畀大家睇下，但Andy都話睇佢個「死刑樣」應該都係唔領情喇！好多外國網民睇完條片，都留言叫主持人小心啲，驚佢犯咗香港國安法！
李八方