警察拉快必其中一條罪就係佢講「7.21唔見人」，警方之前又竄改白衣人無差別襲擊市民歷史，可知7.21絕對係差人心中一條刺，日前美國《大西洋》雜誌刊登評論文章，指港府同警方「公然及放肆地」竄改7.21歷史，更披露特首林鄭月娥當晚唔知發生無差別襲擊事件，因為佢成晚掛住睇大台新聞，唔係創新與統籌辦事處總監馮程淑儀通知，佢哋仲唔知出面發生咁大件事。
《大西洋》雜誌篇文話喺整個反送中運動中，港府收信息往往慢人一步，部份原因係過度依賴傳統媒體，又引述三名消息人士話，777喺7.21當晚同心腹係禮賓府睇實中聯辦一帶示威情況，因保安理由，佢哋將電話放喺房外，而佢哋主要睇主流電視台新聞，完全冇留意網媒同社交平台正廣傳元朗襲擊事件。
咁777幾時先知？文章話到馮程淑儀出房去洗手間，睇到WhatsApp群組收到一連串有關元朗襲擊市民訊息先知，馮程開頭仲要唔信，話元朗站理應關閉，質疑影片係咪「假新聞」。其實港府太依賴主流電視台到今日冇改變，完全唔知好多人已完全唔睇大台新聞。
李八方