郭富城、楊千嬅、張達明及小美昨日齊集尖沙嘴一間戲院,為電影《麥路人》主題曲《灰色星塵》舉行MV首播,郭富城在戲中角色阿博煙不離手,結果他太投入而不停吸,連千嬅也覺得當時郭富城吸得過量,郭富城說:「我自己吸煙都吸到怕,仲要咳得好犀利。」
煞科後,郭富城仍情緒低落,又擔心吸煙過量令肺部受損,他說:「當照晒X光之後,醫生同我講個肺好靚,嗰一刻我成個人輕鬆晒,即刻抽離角色。」早前有報道指太太方媛來自天王嫂訓練營,他說:「太太回應係不實報道,有時網絡太自由,啲人毋須付責任,散播謠言,我作為丈夫梗係撐佢,你哋(造謠者)收手啦!」