中國與各國之間的衝突持續升溫，特朗普掀起的科技戰、貿易戰招招到肉；印度喺抗中方面，都走得好前。短期內會唔會收手？好難啦。
中印邊境爆發嘅衝突，已進一步引爆兩國之間的科技角力。 印度由6月底至今，一共禁咗224個中國App……對當地影響好大，大到最近印度有人因為冇得玩《絕地求生》食雞，屋企上吊身亡。
正正因為影響大，印度更加無路可退，要趁今次反中情緒「戒奶」，減低對中國依賴。上年第二季與第三季，印度Google Play和App Store前200下載量app，中國app佔38%。中國app過去之所以冒起得咁快，多多少少係因為自己起咗道牆，成功阻截其他國家嘅科技巨企，咁先令中國科技產業有發展空間。印度今次某程度上，都係跟中國學嘢啫，先大包圍式封殺中國app，令當地科網公司有二次投胎機會。再者，中國做咗世界工廠咁多年，大家受嘅氣唔少，印度一樣有做世界工廠嘅條件。印度總理莫迪由2014年競選時，已不斷提倡大搞「印度製造」品牌，等咗咁多年，終於等到呢個千載難逢嘅機會，畀着你都會食住上「搶客」吧。
印度交通部長賈德卡利（Nitin Gadkari）之前受BBC專訪，講得就更白：「中國的全球地位衰退，對印度而言是『因禍得福』。」莫迪政府自3月起，為吸引放棄中國嘅外資公司進駐，已陸續推出相關投資優惠，蘋果已開始喺印度組裝iPhone、三星亦計劃印度建生產線。同中國反面，令自己有上位機會，所以相信未來，中印之間嘅花生只會越來越多。
之前都寫過，國際間「去中國化」共識已成事實，中國品牌於國際間的下場，恐怕逐步會被分屍。
如果唔怕俾人話面皮厚嘅，咪好似小米（1810）咁，直接將印度小米招牌「MI」換成Made In India，嘗試扮唔係中國貨。畢竟小米上年全年手機出貨量1.25億部，印度佔4,360萬部，仲多過中國。
千頌C