首次入選英格蘭大國腳嘅菲爾科頓同格連活特，原本乖乖地踢波咪好，點知周一俾人踢爆喺上周末作客一球小勝冰島嘅比賽後，返到入住嘅酒店後居然寂寞難耐要約炮解悶，違反咗冰島隔離令，最後梗係俾領隊修夫基踢出英格蘭大軍啦！件事通天後「女主角」亦被起底，分別係20歲嫩模娜迪亞同埋佢19歲表妹蘿亞，娜迪亞舊年仲代表冰島參選環球小姐入埋決賽，後者亦係法律系學生，睇嚟科頓同格連活特認真識食！
兩位千禧後小將生涯第一次入選大國腳，18歲嘅「綠木」後備上陣，20歲嘅科頓仲首次擔正㖭，齊齊攞到首頂國家隊喼帽，𠵱家搞成咁修夫基都冇眼睇，話佢兩個行為天真又幼稚，最後將佢哋送返英格蘭思過，仲傳話修夫基已決定下個月都唔會徵召佢哋，總共會缺席四場國際賽作為懲罰。今次真係多得兩位女士拍晒片放上網，娜迪亞仲同傳媒爆料話，自己幾個禮拜前已經喺社交平台識到格連活特，喺對方嚟冰島幾日前同佢傾過偈。據講嗰陣時最少有4個當地女士同2位球星網上調情，仲齊齊諗計點樣潛入酒店，但最後得娜迪亞同蘿亞出發。
兩位女角一路去酒店一路拍片放上Snapchat同ig，娜迪亞分享話原本諗住自己赴約，但兩位球星問佢仲有冇多個女仔朋友，就帶埋蘿亞去。喺比賽後大約一個鐘，科頓同格連活特打畀兩位女伴，娜迪亞問：「有咩計劃？我哋可以嚟酒店，但我唔知你哋點樣畀我哋入嚟喎？」科頓就講：「你哋諗住嚟酒店做咩？」孤男寡女共處一室仲有咩好做，格連活特就話：「你認為呢？」兩位女伴都忍唔住笑。
科頓同格連活特訂咗酒店另一個樓層嘅兩間房，廢事俾其他隊友撞到正，佢哋分房大戰各有各玩，科頓仲被影到剝晒光豬，除剩條底褲，露出咗半個屁股。
據娜迪亞話，佢哋四個開始先「互相了解」，仲讚兩位球星都好有紳士風度，大家都好享受呢個美好嘅晚上。兩位女伴喺第二日早餐之前就急急腳離開。
搞出個大頭佛，格連活特已經刪咗自己個twitter賬戶，科頓亦都知衰，兩人後尾都有認錯同埋道歉。至於佢哋效力嘅球會曼聯同曼城，都有出聲明譴責佢哋嘅行為，仲話對兩位小將好失望喎。
