【姐匙Talk】巨型雪梨爭上位嗲導演搞是非

娛樂圈五光十色，的確吸引好多年輕男女虛榮入行，幻想自己成為super star，試問當中有幾多個有潛質，最終變成影帝影后？有時幾努力都好，都要幸運遇上伯樂栽培，先可以走上康莊大道。話說成日掛住新人名牌嘅「巨型雪梨」，入行已經有一段日子，最近終於因一個機會叫做多人識咗。記得佢初出道時，一直賣純情乖乖女形象，仲自爆舊情史造新聞，可惜太奀，未令到大眾對佢有興趣。

自視過高扮大星

其實當時都聽聞巨型雪梨並非真正乖女，只係扮出嚟惜肉如金，口口聲聲話唔會行性感路線，不過浮沉咗幾年之後，完全證實到佢嘅堅持係無謂。巨型雪梨當時冇乜知名度、更加唔多工作，不過佢就當正自己係大星，要求公司提供多啲資源，佢又睇唔起同輩藝人，仲不停利用自己嘅嗲聲嗲氣，狂使助手做嘢。

巨型雪梨早前離開咗舊公司，最終都食言行「賣肉」路線，不過佢就好幸運，被宅男捧做女神。巨型雪梨當然乘勢再賣肉搶機會，不過呢條路都終會有一日過時，而且巨型雪梨年紀已經唔細，再過幾年，晉升中女就會被嫌棄。唔少同巨型雪梨合作過嘅藝人，都對佢敬而遠之，因為最怕見到佢又姣又嗲導演，只係為求加戲，同埋為排斥其他人，而製造是非。

撰文：Jessie

本欄逢周三刊出

姐匙Talk

我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。