阿嬌意外撞傷頭，粉絲都非常擔心傷勢是否影響她的靚樣，《蘋果》昨日致電整形外科專科醫生林竹筠查詢，林醫生表示：「除咗睇傷口嘅大細，要睇返傷口嘅方向，睇報道啲相佢傷口應該係打橫喺條眉上面，如果傷口順住皺紋走勢，一般都係埋口埋得比較好，如果呈90度，呢啲疤痕就會難睇啲。不過今次鍾小姐整親，有樣嘢要留意，佢額頭有條神經線都喺眉上面位置，要睇返撞得幾深，若撞到神經線，小則會令額頭同半邊頭皮有少少痹嘅感覺，嚴重嘅話會令到嗰邊抬頭嘅肌肉弱咗，可能甚至有少少高低眉嘅情況。」
問到是否可以還原來的狀態？林醫生指：「疤痕產生之後就好難完全冇，只可以慢慢等佢冇咁明顯，通常係要三至六個月。好彩一、兩個禮拜後，傷口埋咗，就可以用化妝或遮瑕膏令佢冇咁明顯。」